کے الیکٹرک نے کراچی کے شہریوں کیلئے بجلی مزید مہنگی کرنے کی تیاری کر لی۔

کے الیکٹرک نے بجلی 29 پیسے فی یونٹ مہنگی کرنے کی درخواست دائر کر رکھی ہے، کے الیکٹرک نے درخواست اکتوبر کی فیول ایڈجسٹمنٹ کی مد میں کی ہے۔

نیشنل الیکٹرک پاور ریگولیٹری اتھارٹی (نیپرا) بجلی 29 پیسے فی یونٹ مہنگی کرنے کی درخواست پر آج سماعت کرے گا، درخواست کی من و عن منظوری پر 51 کروڑ 60 لاکھ روپے کا بوجھ پڑے گا۔

دوسری جانب رواں ہفتے نیپرا نے اکتوبر کی ماہانہ فیول ایڈجسٹمنٹ کی مد میں بجلی 4روپے 75پیسے فی یونٹ مہنگی کرنے کی درخواست پر سماعت کی۔

نیپرا نے سماعت کے بعد فیصلہ محفوظ کر لیا جبکہ نیپرا اتھارٹی اعداد و شمار کا جائزہ لینے کے بعد فیصلہ جاری کرے گی۔

واضح رہے کہ اس فیصلے کا اطلاق لائف لائن اور کے الیکٹرک صارفین پر نہیں ہو گا جبکہ صارفین کو آئندہ ماہ کے بلوں میں اضافی ادائیگیاں کرنا ہوں گی۔