شیری رحمان کا کہنا ہےکہ کیا بنی گالا میں بھی گیس کی وجہ سے چولہے بند ہیں؟ 

نائب صدر پیپلز پارٹی سینیٹر شیری رحمان نے گیس بحران پر بیان دیتے ہوئے کہاکہ ملک بھر میں گیس کی عدم فراہمی کے خلاف پیپلز پارٹی آج احتجاج کر رہی ہے، حکومت کی نااہلی کی وجہ سے مسلسل 3 سال سردیوں میں شدید بحران پیدا ہو رہا ہے۔

انہوں نے کہاکہ حکمران بنی گالا سے نکل کر دیکھیں عوام کو کس شدید بحران کا سامنا ہے، تاریخ کی مہنگی ترین گیس کی خریداری پر کسی احتسابی ادارے نے انکوائری کیوں نہیں کی؟  ایل این جی اسکینڈل پر سب خاموش کیوں ہیں؟

یہ بھی پڑھیں: کراچی میں گیس کا بحران جاری؛ شہری مشکلات سے دوچار

شیری رحمان نے کہاکہ اس حکومت نے گزشتہ 3 سالوں میں گیس کی قیمتوں میں 350  فیصد سے زائد اضافہ کیا ہے، دوسروں کو چور ڈاکو کہنے والوں نے کرپشن اور بد انتظامی کے ریکارڈ قائم کئے ہیں۔

نائب صدر پیپلز پارٹی نے مزید کہاکہ وزیراعظم عمران خان صرف نوٹس اور بحران کا اعلان کرتے ہیں، نااہل سرکار کو اب جانا ہوگا۔