بھارت کی ریاست آسام میں  مقبول ترین چائے کی ایک کلو پتی ایک لاکھ روپے کی ریکارڈ قیمت میں فروخت ہوئی۔

کالی پتیوں سے بنی دنیا کے مقبول ترین مشروب کا انسان کے ساتھ جنم جنم کا ساتھ ہے اور یہ برصغیر خاص طور پر پاکستان اور بھارت میں کثرت سے پی جاتی ہے ، چائے کے طلبگار نہ صرف میلوں تک سفر کرنے بلکہ کسی بھی قیمت پر اس کی ایک چسکی لینے کے لیے ہمہ وقت تیار رہتے ہیں۔

بھاری ریاست آسام میں اس مقبول ترین مشروب کے چاہنے والوں نے بھارت کی مہنگی ترین چائے خرید کر سب کی توجہ حاصل کرلی۔

میڈیا رپورٹس کے مطابق بھارتی ریاست آسام کے شہر گواٹی میں ایک نیلامی میں چائے کی ایک کلو پتی 99 ہزار 999 روپے میں فروخت ہوئی جب کہ ایک کلو چائے کی پتی گواٹی کے ہول سیلر ’سوروبا ٹی ٹریڈرز‘ نے ایک لاکھ روپے میں نیلامی کے ذریعے حاصل کی۔

سوروباٹی ٹی ٹرینڈرز کے سی ای او مہیشوری کا کہنا تھا کہ اس چائے کی پروڈکشن بہت کم اور ڈیمانڈ بہت زیادہ ہے ، ہم اس کو بہت وقت سے حاصل کرنے کی کوشش کررہے تھے اور اس کے لیے ہم نے چائے کے باغات رکھنے والے مالکان سے بھی بات کی لیکن انہوں نے ہمیں چائے کی پتی فروخت کرنے کے بجائے نیلامی کے ذریعے خریدنے کا مشورہ دیا۔

خیال رہے 2018 میں اسی برانڈ کی چائے کی پتی ’سوروباٹی ٹی ٹرینڈرز‘ 39 ہزار اور 2019 میں 50 ہزار میں نیلامی کے ذریعے خریدنے میں کامیاب ہوئی تھی تاہم گزشتہ سال یہ پتی ’وشنو ٹی کمپنی‘75 ہزار میں خریدنے میں کامیاب ہوئی تھی۔

دوسری جانب پتی بنانے والے کمپنی کے ترجمان نے کہا ہے کہ ’مانوہاری گولڈ ٹی‘ کی پرڈوکشن ہم نے 2018 میں شروع کی تھی اور تب سے اس پتی کی ڈیمانڈ بہت زیادہ ہے جب کہ اس کی مقبولیت میں دنیا بھر میں اضافہ ہوتا جارہا ہے۔

انہوں نے کہا کہ گولڈ ٹی چائے پتیوں سے نہیں بلکہ نایاب، قیمتی اور نفیس قسم کی کلیوں سے تیارکی جاتی ہے اور اس کے لیے ہمیں بہت طویل مراحل سے گزرنا پڑتا ہے جس کی وجہ سے اس چائے کی پیداوار بھی بہت کم ہے۔

ترجمان نے کہا کہ چائے کی یہ پتی ہر سال صرف 10 کلو تیار کی جاتی ہے لیکن اس سال ہم نے صرف 2 کلو گولڈ ٹی تیار کی ہے جس میں ایک کلو نیلامی کے ذریعے فروخت ہوئی اور ایک کلو ہم نے اپنے دیگر گاہگوں کے لیے رکھی ہے۔