پاکستان کے معروف اداکار حسن احمد کی اہلیہ و معروف اداکارہ ،سپر ماڈل سنیتا مارشل کی بیٹی زینہ کی آمین کی تقریب ہوئی جس کی تصویر اور ویڈیو سوشل میڈیا پر وائرل ہو گئی ہے۔

اداکارہ سنیتا مارشل نے اپنی بیٹی کے قرآن ختم ہونے کی خوشی میں  آمین کی تقریب کا انعقاد کیا۔

انہوں نے اپنے آفیشل انسٹا گرام اکاؤنٹ پر شوہر حسن احمد، بیٹا اور بیٹی کے ہمراہ ایک تصویر اور ویڈیو شیئر کی ہے۔

شیئر کی گئی ویڈیو میں دیکھا جا سکتا ہے کہ زینہ قرآن پاک کی تلاوت کر رہی ہے۔

واضح رہے کہ اداکار حسن احمد نے اپنے ایک انٹرویو کے دوران بتایا تھا کہ میں نے اور سنیتا نے شادی کے وقت ہی یہ فیصلہ کرلیا تھا کہ ہمارے بچے مکمل طور پر صرف دینِ اسلام کی ہی پیروی کریں گے۔

اس دوران اداکارہ سنیتا مارشل کا کہنا تھا کہ اگر میری امّی کے گھر میں کرسمس یا عیسائی مذہب کی کوئی تقریب منعقد ہوتی ہے تو میرے بچے اُس میں شرکت ضرور کرتے ہیں لیکن چرچ نہیں جاتے۔

انہوں نے کہا تھا کہ حسن احمد سے شادی سے لے کر اب تک میرے ہر فیصلے میں میرے والد نے ہمیشہ میرا ساتھ دیا ہے۔

واضح رہے کہ اداکارہ نے 2009 میں ساتھی اداکار حسن احمد سے ایک اسلامی طریقے سے شادی کی تھی اور پھر تین ماہ بعد اپنے عیسائی عقائد کی وجہ سے ایک کیتھولک شادی کی تقریب کی تھی، اس جوڑے کے دو بچے ہیں لڑکا راکین احمد اور لڑکی زینہ احمد ہے۔