پاکستان پیپلز پارٹی کے چیئرمین بلاول بھٹو زرداری نے کہا ہے کہ دہشتگرد کسی بھی شکل میں ہوں، ان سے آہنی ہاتھوں سے نمٹنا قومی فریضہ ہے۔

انہوں نے کوئٹہ میں دہشتگرد دھماکے کی مذمت کرتے ہوئے کہا کہ دہشتگردی میں اپنے پیاروں کو کھونے کا درد میں سمجھ سکتا ہوں، متاثرہ خاندانوں کے دکھ میں برابر کا شریک ہوں۔

چیئرمین بلاول بھٹو نے دھماکے میں معصوم شہریوں کی شہادت پر افسوس کا اظہار کرتے ہوئے کہا کہ دھماکے کے زخمیوں کے بہتر علاج معالجے کو یقینی بنایا جائے۔

بلاول بھٹو زرداری نے دھماکے میں زخمی ہونے والے افراد کے لئے بھی جلد صحتیابی کی دعا کی ہے۔

متعلقہ خبر: عوام کے جان ومال کا تحفظ پولیس اور سیکیورٹی اداروں کی ذمہ داری ہے، وزیراعلیٰ بلوچستان

اس سے قبل کوئٹہ میں جناح روڈ پر سائنس کالج کے قریب دھماکہ ہوا جس کے نتیجے میں 4 افراد جاں بحق اور 15 زخمی ہوگئے۔

دھماکے کے بعد ریسکیو ٹیموں کو اطلاع دی گئی جنہوں نے موقع پر پہنچ کر زخمیوں کو اسپتال منتقل کردیا جہاں زخمیوں کو طبی امداد فراہم کی جاری تھی۔

پولیس کا کہنا تھا کہ دھماکا ایک گاڑی کے قریب  ہوا تاہم دھماکے کی نوعیت کا تعین کیا جارہا تھا جب کہ علاقے کو گھیرے میں بھی لے لیا تھا۔