سردارعثمان بزدارکی حکومت نے ایک اور احسن ترین اقدام کا اعلان کیا ہے۔

پنجاب بھر کے اسکولوں میں اسمبلی کے دوران درود شریف پڑھنا لازم قرار دے دیا گیا۔

محکمہ اسکول ایجوکیشن کے جاری کردہ مراسلے کے مطابق لاہورسمیت پنجاب بھر کے اسکولوں میں اسمبلی کے دوران درود شریف پڑھنا لازم ہو گا۔

محکمہ اسکول ایجوکیشن کے  مطابق اسکولوں میں اسمبلی کے دوران ترانے سے پہلے درودشریف پڑھنا ہو گا۔

اسکولوں کی اسمبلی میں درود شریف کے ساتھ قرآن پاک کی آیات بھی پڑھنا ہوں گی ، اس کے علاوہ اسمبلی میں ملک اور قوم کی ترقی اور سلامتی کے لیے دعا بھی لازمی کرنی ہو گی۔

یہ بھی پڑھیں: اسکول اسمبلی میں درود شریف پڑھنے کی ہدایت

جاری کردہ مراسلے کے مطابق محکمہ اسکول ایجوکیشن نے تمام ڈسٹرکٹ ایجوکیشن اتھارٹیز کو مراسلہ جاری کر دیا ہے۔

وزیراعلیٰ پنجاب کا کہنا ہےکہ درو د شریف کے بے پناہ فضائل ہیں، اسکولوں کی اسمبلی میں درود شریف پڑھنے سے نئی نسل بھی اس کی فضیلت اور برکت سے فیض یاب ہوگی۔

انہوں نے مزید کہاکہ رحمتہ اللعالمین حضرت محمدؐ کی خدمت میں درود شریف پیش کرنا ہر مسلمان کیلئے اعزاز ہے، بارگاہ رسالتؐ میں درود شریف پیش کرنے سے برکات نازل ہوتی ہیں۔