طلباء کے آئینی تعلیمی حقوق کیلئے ملک بھر میں 16 دسمبر سے احتجاجی تحریک کا اعلان کیا گیا ہے۔

صدر آل پاکستان پرائیویٹ اسکولز فیڈریشن کاشف مرزا کا کہنا ہے کہ 42 کنٹونٹمنٹ بورڈز میں 30 ہزار پرائیویٹ اسکولز کی بے دخلی سے آؤٹ آف اسکولز بچوں میں خطرناک اضافہ ہوگا۔

کاشف مرزا نے کہا کہ ملک بھرکنٹونٹمنٹ بورڈز حکام کے پاس تعلیم کا متبادل نظام نہیں ہے، بےدخلی کی وجہ سے مزید40 لاکھ بچے اسکول چھوڑ کرآؤٹ آف اسکول بچوں کی تعداد 3کروڑ ہوجائے گی۔

انہوں نے کہا کہ ملک بھر کے 42 کنٹونٹمنٹ بورڈز میں 30ہزار پرائیویٹ اسکولز، 4 لاکھ اساتذہ 40 لاکھ طلباء کو زیور تعلیم سے آراستہ کررہے ہیں۔

صدر آل پاکستان پرائیویٹ اسکولز فیڈریشن کا کہنا ہے کہ حکومت کنٹونٹمنٹ بورڈز ایکٹ میں ترمیم کر کے والدین، اساتذہ اور طلباء کی تشویش کا ازالہ کرے۔

کاشف مرزا نے مزید کہا کہ وزیراعظم، چیف جسٹس، آرمی چیف کنٹونمنٹ ایریاز سے اسکولز کی بےدخلی رکوائیں۔