سوشل میڈیا ایکٹوسٹ اور رئیلٹی شو ہوسٹ وقار زکا نے سماجی رابطے کی ویب سائٹ پر ایک ویڈیو اپ لوڈ کی جس میں بہت ساری پرانی اور نئی ویڈیوز کے کلپ جوڑے گئے ہیں۔

ویڈیو میں انہوں نے کہا ’’دوستوں میں ان میں سے نہیں جو کسی مسئلے پر ٹوئٹ کرنے کے بعد آگے بڑھ جائے بلکہ اس مسئلے کو حل کرنے کی پوری کوشش کرتا ہوں۔

وکار زکا نے اپنی پرانی ویڈیو شیئر کرتے کہا کہ آپ لوگوں کو 2015 میں راحیلہ کا کیس یاد ہوگا جسے تیزاب گردی کا نشانہ بنایا گیا تھا اور ایک نوجوان نے چاند رات کو شادی سے انکار پر اس پر تیزاب پھینک دیا تھا لیکن اسے سزا نہیں ہورہی تھی۔

پرانی ویڈیو میں دیکھا جاسکتا ہے کہ خود متاثرہ لڑکی وقار زکا کا شکریہ ادا کرتے ہوئے کہہ رہی ہیں کہ وقار بھائی نے ہمارے لیے بہت کچھ کیا ہے اور ہمیں امید ہے کہ وہ آگے بھی ہماری مدد کرتے رہیں گے۔

دوسری جانب وقار زکا نے آج یعنی 14 دسمبر کی ویڈیو کلپ دکھائی جس میں 2015 میں تیزاب گردی کا شکار بننے والی لڑکی راحیلہ ویڈیو کال پر موجود ہیں اور ایک بار پھر وقار زکا کا شکریہ ادا کرتے ہوئے کہہ رہی ہیں ’’انہیں انصاف مل گیا‘‘۔

راحیلہ نے ویڈیو میں کہا ’’آپ نے میرا بھرپور ساتھ دیا، صرف ایک چیز میں نہیں بلکہ شروعات سے آخر تک میرا ساتھ دیا‘‘۔ جس پر میزبان نے سوال پوچھا آپ یہ بتائیں ابھی ایسا ہوا کیا جس پر آپ نے مجھے کال کی۔

متاثرہ لڑکی نے جواب دیا کہ 17 جولائی 2015 کو مجھے تیزاب گردی کا شکار بنایا گیا تھا لیکن کیس عدالت میں چلنے کے باجود مجھے انصاف نہیں مل رہا تھا، کبھی ہمارا وکیل نہیں آتا تو کبھی ان کا موجود نہیں ہوتا اور کبھی کوئی اور مسئلہ آجاتا ، جس پر ہمیں تاریخ پر تاریخ مل رہی تھی لیکن بلآخر آج 6 سال بعد مجھے انصاف مل گیا۔

متاثرہ لڑکی نے کہا کہ میری امید سے زیادہ مجرم پولیس کانسٹیبل ذیشان عمر کو سزا سنائی گئی ہے جسے عدالت نے 10 لاکھ روپے جرمانہ اور عمرقید کی سزا سنائی ہے جس پر میں بے حد خوش ہوں اور خاص طور پر آپ کا شکریہ ادا کرتی ہوں کہ آپ نے ہمیں اس کیس کے لیے اچھے وکیل کرواکر دیے اور انہوں نے اس کیس پر محنت کی جس کا نتیجہ ہمیں ملا۔

راحیلہ نے کہا چونکہ ملزم اثرورسوخ والے تھے اس لیے کیس پہلے دہشت گردی کی عدالت میں چلا جس کے بعد ہائی کورٹ اور پھر سیشن کورٹ میں چلا گیا تھا لیکن اس دوران مجھے بہت سے مراحل سے گزرنا پڑا لیکن میں نے ہمت نہیں ہاری۔

انہوں نے تیزاب گردی کا شکار بننے والی تمام لڑکیوں سے درخواست کی کہ وہ ہمت نہیں ہارے، پہلے تو میں دعا کرتی ہوں کہ کسی کے ساتھ بھی ایسا واقعہ نہ ہو ، اور اگر ہوبھی جائے تو وہ لوگ ہمت نہ ہاریں، کیوں اللہ آپ جیسے کسی انسان کو وسیلہ بناہی دیتا ہے اور میرا اپنی عدالتوں پر یقین بہت زیادہ پختہ ہوگیا ہے۔

وقار زکا کے سوال کے جواب میں متاثرہ خاتون نے کہا کہ میرا علاج بہت بہترین چل رہا ہے اور میں بہت جلد ماسک کے بغیر آپ کے پروگرام میں شرکت کروں گی۔