سعودی عرب کے میڈیا کے مطابق اومیکرون کے خدشے کے باعث ملک میں دوبارہ کرفیو یا لاک ڈاؤن لگنے کا خدشہ ہے۔

سعودی عرب کے محکمہ صحت وقایہ کے چئیرمین ڈاکٹر محمد عماد المحمدی نے کہا کہ عالمی مرض کورونا کے نئے ویرئینٹ اومیکرون کا موسم سرما میں پھیلنے کا خدشہ ہے۔

وقایہ کے معاون ایگزیکٹو چئیرمین کا کہنا تھا کہ آنے والے ہفتوں میں کورونا کیسز میں اضافے کا امکان ہے۔

انہوں نے کہا کرفیو یا لاک ڈاؤن کے امکان کو مسترد نہیں کیا جاسکتا۔ اسی حوالے سے کرفیو پاس کے لئے ایک ایپ بھی لانچ کر دی گئی ہے جو بوقت ضرورت استعمال ہو گی۔

چئیرمین کا کہنا تھا کہ فی الحال ملک میں کورونا کے متاثر مریضوں کی تعداد کم ہے ، لاک ڈاؤن یا کرفیو کا فیصلہ اسپتالوں پر پڑنے والے دباؤ اور نازک مریضوں کی تعداد کو دیکھ کر کیا جائے گا۔

سعودی عرب کے محکمہ صحت کے ایگزیکٹو چئیرمین نے کہا وائرس سے بچاؤ کے لئے شہری دی گئی ہدایات پر سختی سے عمل کریں ۔

شہریوں کو دی گئی ہدایات کے مطابق سماجی فاصلہ ، ماسک پہننا اور ہاتھوں کی بار بار صفائی شامل ہے۔

اس کے علاوہ عوامی اور پرہجوم مقامات پر بھی احتیاطی تدابیر اختیار کرنے کی ہدایات جاری کی گئی ہیں۔

واضح رہے کہ سعودی حکومت کے محکمہ صحت کی جانب جاری کردہ اعدادوشمار کے مطابق آج کورونا کے 332 کیسز مثبت آئے ہیں، جبکہ ایک شخص کی موت واقع ہو گئی ہے۔