وفاقی وزیر برائے توانائی نے خطرے کی گھنٹی بجاتے ہوئے کہا ہے کہ گیس کے ذخائر ختم ہونے کو ہیں۔

وزیر توانائی حماد اظہر نے کابینہ کو بریفنگ میں بتایا کہ گیس کے ذخائر 9 فیصد سالانہ کی شرح سے کم ہو رہے ہیں، نئے ذخائر نہ ملنے کے باعث آئندہ سالوں میں گیس مکمل ختم ہو جائیگی۔

حامد اظہر کا کابینہ اجلاس میں کہنا تھا کہ مستقبل میں درآمدی گیس پر ہی انحصار کرنا ہوگا، جس کیلئے نئے ایل این جی ٹرمینلز کی تعمیر جاری ہے۔

حماد اظہر نے بتایا کہ روس کے تعاون سے گیس پائپ لائن کی تعمیر کی کوششیں بھی جاری ہیں۔

وزیراعظم عمران خان نے وزیر توانائی کی بریفنگ پر گیس کی پیداوار میں کمی کا نوٹس لے لیا۔

وزیراعظم نے گیس چوری اور ضیاع کی تفصیلات طلب کرتے ہوئے استفسار کیا کہ کیا گیس چوری، ضیاع اور ملی بھگت گیس پیداوار میں کمی کا باعث بن رہے ہیں؟

وزیراعظم نے گیس کے ذخائر میں تیزی سے کمی پر تشویش کا اظہار کرتے ہوئے ذخائر میں بہتری کیلئے قلیل، وسط اور طویل مدتی منصوبے شروع کرنے کی ہدایت جاری کی۔