وفاقی وزیر داخلہ شیخ رشید احمد نے کہا ہے کہ او آئی سی کانفرنس کی وجہ سے عوام کو تکلیف کا سامنا ہے جس پر معذرت کرتے ہیں۔

ڈی ایچ کیو اسپتال راولپنڈی کے دورے کے دوران شیخ رشید احمد نے میڈیا سے گفتگو کرتے ہوئے کہا کہ او آئی سی کانفرنس کے بعد نئی پلاننگ کریں گے، کوشش ہے جرائم کا خاتمہ ہو۔

ان کا کہنا تھا کہ او آئی سی کانفرنس 40 سال بعد پاکستان میں ہو رہی ہے، او آئی سی ایک اہم ایشو پر ہو رہی ہے، پیر تک اسلام آباد میں عام تعطیل کا اعلان کیا ہے، عوام سے معذرت ہے کہ ان کو او آئی سی کانفرنس کی وجہ سے تکلیف کا سامنا رہا۔

اسپتال کے دورے کے دوران شیخ رشید پولیس مقابلے کے دوران زخمی ہونے والے اہلکاروں کی عیادت بھی کی، انہوں نے کہا کہ گزشتہ  رات کارروائی میں 2 ڈاکو ہلاک جبکہ 3 پولیس اہلکار زخمی ہوئے، اسلام آباد راولپنڈی پولیس کا جوائنٹ میکانزم بنا رہے ہیں، پولیس کو اخلاقی حمایت کی ضرورت ہے،جو اہلکار زخمی ہوئے ہیں ان کو ایوارڑ سے نوازا جائے گا۔