بلاول بھٹو زرداری نے کہا ہے کہ شہید محترمہ بینظیر بھٹو مثالی عالمی لیڈر تھیں۔

پاکستان پیپلز پارٹی کے چیئرمین بلاول بھٹو زرداری نے محترمہ بینظیر بھٹو کے 14 ویں برسی پر اپنے ایک پیغام میں کہا کہ عالم اسلام کی پہلی خاتون وزیراعظم شہید محترمہ بینظیر بھٹو کو خراج عقیدت پیش کرتے ہیں۔

انہوں نے کہا کہ بینظیر بھٹو ایک تحریک اور مشعلِ راہ ہیں، محترمہ بینظیر نے ملک میں بہادری سے جمہو ریت کے لیے تاریخی جدوجہد کی۔

بلاول بھٹو زرداری کا کہنا تھا کہ شہید محترمہ بینظیر بھٹو مثالی عالمی لیڈر تھیں، قوم محترمہ شہید بینظیر بھٹو کے قومی جذبے، طویل جدوجہد اور قیادت کو کبھی فراموش نہیں کرے گی۔

پاکستان پیپلز پارٹی کے چیئرمین نے کہا کہ بینظیر بھٹو کا مشن عوام کو غربت، بیروزگاری اور ناانصافیوں سے نجات دلانا تھا، محترمہ کا روالپنڈی میں قتل پوری قوم کو قتل کرنے کی سازش تھی۔

ان کا کہنا تھا کہ شہید محترمہ بینظیر بھٹو ہمہ گیر شخصیت کی مالک تھیں، بینظیر بھٹو نے ملک میں اتحاد، ہم آہنگی اور ترقی پسند سوچ کو فروغ دیا۔

پاکستان پیپلز پارٹی کے چیئرمین نے کہا کہ محترمہ نے عوام کے سیاسی و معاشی حقوق کی حفاظت کی جبکہ بطور وزیراعظم محترمہ نے شدید مخالفت و رکاوٹوں کے باوجود ملک میں عوام دوست پالیسیاں بھی متعارف کرائیں۔

بلاول بھٹو زرداری نے کہا کہ محترمہ اسلامی دنیا کی پہلی منتخب خاتون وزیراعظم تھیں، محترمہ نے عوامی خدمت پر مبنی اقدامات کئے، اور عالمی سطح پر ملک کی مثبت عکاسی کو اجاکرکیا۔

ان کا کہنا تھا کہ شہید بی بی کا مادرِ وطن کے دفاع کے لیے میزائیل ٹیکنالاجی کا تحفہ بھی ایک ناقابلِ فراموش تحفہ ہے۔

پاکستان پیپلز پارٹی کے چیئرمین بلاول بھٹو زرداری کا مزید کہنا تھا کہ شہید بی بی نے آخری گھڑی تک بلا خوف و خطر جمہوریت کی لڑائی لڑتے ہوئے جامِ شہادت نوش کیا ،27 دسمبر کا دن پیپلزپارٹی جیالوں کے لیے تجدید عہد وفا کا دن ہے۔