سرکاری اسکولوں میں کتابوں کی کمی پر وزیر تعلیم کو گرفتار کرلیا گیا ۔

غیر ملکی خبررساں ادارے کے مطابق لیبیا کی پراسیکیوشن سروس کی جانب سے ایک بیان میں کہا گیا ہے کہ وزیر تعلیم موسیٰ المیقاریف کو حراست میں لے لیا گیا ہے۔

رپورٹ میں کہا گیا ہے کہ لیبیا کے سرکاری اسکولوں میں کتابوں سے متعلق تحقیقات کے دوران یہ بات سامنے آئی کہ کتابوں میں کمی پر لاپرواہی برتی گئی ہے اور اسی وجہ سے وزیر کو گرفتار کیا گیا۔

 خیال رہے لیبیا میں اسکولوں میں کتابوں سے متعلق ایک معاہدہ کیا گیا تھا جس کی وجوہات جاننے کے لیے تحقیقات کی جارہی ہیں جس میں کتابوں کی کمی سمیت متعدد انکشافات سامنے آئے۔

کیس میں لیبیا کے وزیر برائے منصوبہ بندی اور متعدد سرکاری افسران بھی مطلوب ہیں۔

واضح رہے کہ معمر قذافی کے دور سے لیبیا کے حکام ستمبر میں تعلیمی سال کے آغاز پر ہر طالب علم کو مفت نصابی کتب فراہم کرنے کے لیے بجٹ مختص کرتے ہیں۔

تاہم اس سال سیکڑوں طلبہ کو کتابیں نہیں ملی اور وہ اپنی مدد آپ کے تحت اپنے دوستوں کی کتابیں لے کر فوٹوکاپی کروارہے ہیں کیوں کہ کتابوں کی کمی کا فائدہ اٹھاتے ہوئے دکاندار تمام کتابیں مہنگی داموں فروخت کررہے ہیں۔