او آئی سی وزرائے خارجہ اجلاس اسلام آباد میں کل صبح 11:30 پر شروع ہو گا۔

افتتاحی اجلاس کی صدارت وزیر خارجہ مخدوم شاہ محمود قریشی کریں گے، اجلاس کا آغاز شاہ محمود قریشی کے خطاب سے ہو گا۔

وزیر خارجہ شاہ محمود قریشی کے بعد سعودی وزیر خارجہ  فیصل بن فرحان السعود اجلاس سے خطاب کریں گے، او آئی سی کے علاقائی گروپوں ایشیا،  افریقہ اور عرب کی جانب سے بیان پڑھا جائے گا۔

بیان کے بعد اسلامی ترقیاتی بینک کے صدر ڈاکٹر محمد الجسیر خطاب کریں گے، اسلامی ترقیاتی بینک کے صدر کے بعد وزیر اعظم عمران خان کا خطاب ہو گا، 12 سے ساڑھے 6 بجے تک کا اجلاس بند کمرہ اجلاس ہو گا۔

میڈیا کو صرف پریس گیلری میں جانے کی اجازت ہو گی، ساڑھے 6 بجے وزیر خارجہ مخدوم شاہ محمود قریشی اور او آئی سی سیکرٹری جنرل حصین براہیم طحہ مشترکہ پریس کانفرنس کریں گے، مشترکہ پریس کانفرنس پارلیمنٹ ہاؤس میں ہی ہو گی۔

وزرائے خارجہ کے اجلاس کے دوران کسی کو ریڈ زون میں داخلے کی اجازت نہیں ہو گی، ریڈ زون صرف وی آٰئی پی نقل و حرکت کے لیے کھلا ہو گا۔

واضح رہے کہ وزیر خارجہ مخدوم شاہ محمود قریشی کا کہنا تھا کہ او آئی سی وزرائے خارجہ کونسل کے غیر معمولی اجلاس کی میزبانی کو بہت بڑا اعزاز سمجھتے ہیں، وزیر اعظم عمران خان کی خصوصی ہدایت پر مہمان وزرائے خارجہ و دیگر وفود کی سہولت کیلئے ہر ممکن انتظامات کو یقینی بنایا گیا ہے۔

وزیر خارجہ مخدوم شاہ محمود قریشی کا کہنا تھا کہ امید ہے کہ افغانستان کی انسانی صورتحال کے تناظر میں منعقد ہونے والے اس غیر معمولی وزرائے خارجہ اجلاس کے مثبت نتائج سامنے آئیں گے۔

اجلاس میں او آئی سی کے وزرائے خارجہ کے علاوہ اقوام متحدہ، یورپی یونین اور بین الاقوامی مالیاتی اداروں کے نمائندوں سمیت امریکا، چین، روس، جرمنی، اٹلی، جاپان اور فرانس کے خصوصی مندوبین کو بھی دعوت دی گئی ہے جبکہ افغانستان کی عبوری حکومت کا نمائندہ وفد بھی کانفرنس میں شرکت کریں گا۔

امریکا کے نماٰندہ خصوصی ٹام ویسٹ اس اجلاس میں شرکت کریں گے۔