شہباز شریف کا کہنا ہے کہ ہرماہ بجلی اور اشیائے ضروریہ کی قیمتوں میں اضافہ قوم کا معاشی استحصال اور قتل ہے۔

صدر مسلم لیگ ن و قائد حزب اختلاف شہباز شریف نے اپنے بیان میں کہا ہے کہ بجلی کے ہر اضافے پر قوم کو یاد آ جاتا ہے کہ بجلی کی قیمت بڑھانے والا وزیراعظم چورہوتا ہے۔

انھوں نے کہا کہ بجلی کی قیمت بھی بڑھتی جا رہی ہے لیکن پھر بھی گردشی قرض تاریخ کی بلند ترین سطح پر پہنچ چکا ہے۔ حکومت بجلی کی قیمت بڑھا کر بھی گردشی قرض کم نہیں کرسکی۔

قائدِ حزبِ اختلاف نےکہا کہ حکومت نے دعویٰ کیا تھا کہ گردشی قرض ختم کردیں گے لیکن یہ قرض کم ہونے کے بجائے دوگنا ہوچکا ہے۔ بجلی کی قیمتیں بڑھانا مسئلے کا حل نہیں، عوام اور معیشت کے مسائل مزید نہ بڑھائے جائیں۔

شہباز شریف کا اپنے بیان میں کہنا تھا کہ قوم کو مزید تکلیف دینے کے بجائے حکومت مستعفی ہوجائے۔ یہ حکومت عوام کے لیے مستقل تکلیف کا باعث بن چکی ہے، اس سے نجات ہی قوم کو مصائب سے نجات دے سکتی ہے۔

قائدِ حزبِ اختلاف شہباز شریف نے حکومت سے بجلی کی قیمتوں میں 4 روپے 33 پیسے فی یونٹ مزید اضافے کی درخواست واپس لینے کا مطالبہ کیا ہے۔