سیشن عدالت لاہور میں میشا شفیع کے خلاف ہتک عزت دعوی کی سماعت 3 دسمبر تک ملتوی کرتے ہوئے عدالت نے میشا شفیع کی والدہ صبا حمید کو جرح کیلئے طلب کرلیا ہے۔

تفصیلات کے مطابق سیشن کورٹ لاہور نے میشا شفیع کا طلبی کی درخواست پر تحریری جواب ریکارڈ کا حصہ بنا دیا۔ میشا شفیع کے وکیل نے عدالت میں جواب جمع کروایا کہ میشا شفیع  16 دسمبر کو پاکستان آئیں گی۔

میشا شفیع کی طرف سے کہا گیا کہ میں ایک پروفیشنل آرٹسٹ ہوں، کام کی وجہ سے مختلف ممالک کا سفر کرنا ہوتا ہے۔ جس ملک جاتی ہوں اپنے ذریعہ معاش کے لیے ہی جاتی ہوں۔ 16 دسمبر سے 20 دسمبر تک پاکستان آؤں گی۔

وکیل میشا شفیع نے کہا کہ چاردنوں میں علی ظفر کے وکلا جرح مکمل کرسکتے ہیں۔ میشاء شفیع 20 دسمبر کے بعد واپس چلی جائیں گی۔  ہہلے ویڈیو لنک پر جرح کی درخواست دی جس پرعدالت نے فیصل محفوظ کر رکھا ہے۔

میشا شفیع کے وکیل کے مطابق میشا شفیع اب ویڈیو لنک کے ذریعے جرح کی درخواست پر زور نہیں دینا چاہتیں۔ ان کے خاوند کینیڈا میں بچوں کی دیکھ بھال کے لیے رکے ہوئے ہیں وہ پیش نہیں ہو سکتے۔

میشا شفیع نے استدعا کی کہ میرے خاوند کے بیان پر جرح ویڈیو لنک کے ذریعے ہی کی جائے۔