کراچی میں ایس آئی یو / سی آئی اے پولیس نے کارروائی کی ہے۔

تفصیلات کے مطابق کارروائی کے دوران منشیات فروش گینگ کے 4  کارندے، منشیات اور چوری شدہ موٹر سائیکل سمیت گرفتار کئے گئے۔

ایس ایس پی عارف عزیز کا کہنا ہے کہ ایس آئی یو نے علی محمد گوٹھ نیو کراچی اور کلفٹن سے 04 منشیات فروش/ موٹر سائیکل چور مظہر حسین، انور علی ،عبد المالک اور فرمان کو 7 کلو 695 گرام چرس اور ایک چوری شدہ موٹر سائیکل سمیت گرفتار کر لیا۔

ان کا کہنا تھا کہ دوران تفتیش ملزمان نے انکشاف کیا ہے کہ وہ منشیات حب چوکی سے خریدتے ہیں جو کہ کلفٹن اور ڈیفنس کے علاقوں میں سپلائی کرتے ہیں۔

انہوں نے کہا کہ ملزمان مظہر اور انور سے برآمدہ شدہ موٹر سائیکل تھانہ سولجر بازار سے چوری شدہ ہے، قبل ازیں بھی دونوں ملزمان تھانہ پریڈی، سچل اور سپر مارکیٹ کے 05 مقدمات میں گرفتار ہو چکے ہیں۔

عارف عزیز کے مطابق ملزمان مظہر اور انور منشیات سپلائی کے ساتھ کراچی کے مختلف علاقوں سے موٹر سائیکلیں بھی چوری کرتے ہیں۔

ایس ایس پی عارف عزیز کا مزید کہنا تھا کہ گرفتار ملزمان سے منشیات کی برآمدگی پر ان کے خلاف نارکوٹکس کنٹرول ایکٹ کے تحت 04 مقدمات تھانہ ایس آئی یو میں درج کر لیے گئے ہیں۔

ملزمان سے مزید تفتیش جاری ہے۔