آصف علی زرداری نے کہاہےکہ پیپلزپارٹی نے لاہورمیں نیا جنم لیا ہے جو پنجاب میں تبدیلی کا باعث بنے گا۔

سابق صدر آصف علی زرداری نے این اے 133 کے ووٹروں سے اظہار تشکر کرتے ہوئے پیپلزپارٹی کے عہدیداروں، کارکنوں اور ہمدردوں کو خراج تحسین پیش کیا۔

سابق صدر نے کہاکہ این اے 133 میں پیپلز پارٹی کے ووٹروں میں اضافہ بہت بڑا پیغام ہے،جیالے میدان میں آ چکے آئندہ انتخابات کی تیاریاں شروع کردیں۔

انہوں نے کہاکہ این اے 133 کے انتخابی نتائج حوصلہ افزا ہیں، پیپلزپارٹی کے عہدیداروں اور جیالوں نے بہترین کارکردگی کا مظاہرہ کیا ، آئندہ الیکشن میں جیت جیالوں کی ہوگی۔

آصف زرداری نے مزید کہاکہ انشاءاللہ وفاق کی طرح چاروں صوبوں میں حکومت بنائیں گے۔

اس سے قبل بلاول بھٹونے پیشگوئی کرتے ہوئے کہا کہ پنجاب کا اگلا وزیراعلیٰ پاکستان پیپلزپارٹی سے ہوگا۔

پاکستان پیپلزپارٹی کے چیئرمین بلاول بھٹو زرداری نے این اے 133 کے ضمنی انتخابات کے حوالے سے لاہور کے عوام کا شکریہ ادا کرتے ہوئے کہاکہ انتخابی مہم میں متحرک تمام جیالوں اور تنظیم کے عہدیداران کو شاباش دیتا ہوں۔

انہوں نے کہاکہ پاکستان پیپلزپارٹی نے لاہورمیں ایک نئی کروٹ لی ہے، اگلا دور پی پی پی کا ہوگا، این اے 133 کا ضمنی انتخاب نے یہ بھی ثابت کیا کہ پاکستان پیپلزپارٹی وفاقِ پاکستان کو جوڑنے والی پارٹی ہے۔

 بلاول بھٹو زرداری نے کہاکہ لاہور سے کراچی اور کوئٹہ سے پشاور تک پاکستان پیپلزپارٹی ایک زندہ حقیقت ہے۔