انگلینڈ کے فٹ بال کلب ٹاٹینہم کے کھلاڑیوں اور اسٹاف ممبرز سمیت 13 افراد میں کورونا کی تشخیص کی تصدیق ہو گئی۔

انگلش پرئمئیر لیگ کے نمبر 7  فٹ بال کلب پر کورونا کے مہلک وائرس نے اپنے پنجے گاڑ دیئے۔ کلب مینجرانتونیو کونٹی نے ایک پریس کانفرنس کرتے ہوئے صحافیوں کو بتایا کہ کلب کے 8 کھلاڑیوں اور 5 اسٹاف ممبرز کے کورونا ٹیسٹ مثبت آ گئے ہیں۔ ان کا کہنا تھا کہ یہ ایک مشکل صورتحال ہے مگر صورتحال کا سامنا کرنے کو تیار ہیں۔

انتونیو نے کہا دنیا میں ہر روز کورونا وائرس سے متاثر ہونے والے افراد کی تعداد میں اضافہ ہو رہا ہے۔

واضح رہے کہ کورونا وائرس کی تصدیق کی خبر اس وقت سامنے آئی ہے جب کلب کا صرف 24 گھنٹے بعد فرنچ کلب رینیز سے یورپا کانفرنس لیگ کا میچ ہونے جا رہا ہے۔

انتونیو کے اس میچ کے حوالے سے کہنا ہے کہ میچ کے لئے 11 کھلاڑی دستیاب ہیں ، اور ہم پوری تیاری کے ساتھ میدان میں اتریں گے۔

انتونیو نے مزید کہا کہ کلب کا ہر فرد تھوڑا بہت خوفزدہ ضرور ہے ، مگر یہ عالمی مرض اب بڑھتا ہی جا رہا ہے، آج ٹریننگ سیشن کے بعد دوبارہ ایک کھلاڑی پر ٹیسٹ مثبت نکلا ، اب اس وائرس کا اگلا شکار کون ہو گا اس کا اندازہ نہیں ہے، مگر انہی غیر یقینی اور خوف کی صورتحال میں اپنا کھیل جاری رکھنا ہے۔

واضح رہے کہ گزشتہ سیزن میں ٹاٹینہم فٹ بال کلب کے چھ پریمئیر لیگ میچز کورونا کے باعث ملتوی کر دیئے گئے تھے۔