تحریک لبیک پاکستان کے رہنماؤں سے ملاقات کے معاملے پر سینیٹر اعجاز چوہدری کا کہنا ہے کہ میں فواد چوہدری کی کسی بات کا جواب نہیں دینا چاہتا۔

وفاقی وزیر فواد حسین چوہدری نے اعجاز چوہدری سے متعلق ایک انٹرویو سینیٹر اعجاز چوہدری کی تحریک لبیک کے رہنماوں سے ملاقات کو بے ہودہ حرکت قرار دیتے ہوئے کہا تھا کہ انہوں نے شہید پولیس اہلکاروں کے گھر کا دورہ کیوں نہیں کیا؟

سینیٹر اعجاز چوہدری کا اس حوالے سے کہنا ہے کہ زبان کا استعمال ہی شدت پسندی پیدا کرتا ہے۔ شدت پسندی کا واحد حل یہ ہے کہ آپ آگاہی پیدا کریں اور تعلیم دیں۔

اعجاز چوہدری نے کہا کہ جب ایسا نہیں کرتے تو ہمیں شدت پسندوں کے سامنے جھکنا پڑتا ہےاور ان کے سامنے گٹھنے ٹیکنے پڑتے ہیں۔

سینیٹر اعجاز  کا مزید کہنا تھا کہ ایسا وقت آنے سے قبل مکالمہ کرنا بہتر ہے۔ ٹی ایل پی اور پی ٹی آئی کے سیاسی مستقبل پر بات کرنا قبل از وقت ہے۔

انہوں نے کہا کہ میں نے آگ کو مدھم کرنے کے لیے پانی ڈال ، تیل نہیں چھڑکا۔

خیال رہے کہ سینیٹر اعجاز چوہدری نے گزشتہ ماہ تحریک لبیک پاکستان کے سربراہ سعد حسین رضوی سے جذبہ خیر سگالی کے تحت ملاقات کی تھی اور انہیں جیل سے رہائی پر مبارکباد دی تھی، اعجاز کے گلے ملنے اور سعد رضوی کو گلدستہ پیش کرنے کی تصاویر سوشل میڈیا پر بڑے پیمانے پر شیئر کی گئی تھیں۔