پاکستان مسلم لیگ (ن) کے صدر اور قائد حزب اختلاف شہباز شریف نے بجلی کی قیمت میں 4 روپے 75 پیسے فی یونٹ اضافے کی شدید مذمت، اضافہ واپس لینے کا مطالبہ کیا ہے۔

اپنے بیان میں شہباز شریف نے کہا  کہ عمران نیازی کے “سستے پاکستان” میں بجلی مزید مہنگی ہوگئی یہ ہے “سستے پاکستان” کی اصل حقیقت، ہر ماہ بجلی کے بل عوام کے گھروں پر مہنگائی کا کوڑا بن کر برستے ہیں۔

ان کا کہنا تھا کہ ظالم حکومت بے حسی کے ریکارڈ توڑ چکی ہے۔ حکومت الٹی چھری سے قوم کو زبحہ کر رہی ہے، عوام کے سینوں میں کھولتا لاوا اور نفرت پاکستان کے لئے اچھی علامت نہیں۔

 پاکستان مسلم لیگ (ن) کے صدر نے کہا کہ آئی ایم ایف کے حکم پر بجلی کی قیمت میں مزید اضافہ کیاگیا، عمران خان کہتے تھے بجلی کی قیمت بڑھانے والا وزیراعظم چور ہوتا ہے۔

شہباز شریف کا کہنا تھا کہ نیپرا کا نوٹیفیکیشن عمران نیازی کو بھیجا جائے تاکہ انہیں “سستے پاکستان” میں غریبوں کی سچائی کا شایدکچھ احساس ہو، پاکستان میں “سستی ترین” حکومت عوام کے لئے تاریخ کی مہنگی ترین، نالائق ترین اور کرپٹ ترین حکومت ثابت ہوئی ہے۔

انہوں نے کہا کہ حکومت نے بجلی کی قیمت تاریخ کی بلند ترین سطح پر پہنچا دی، پھر بھی گردشی قرض دوگنا ہوگیا، حکومت مہنگائی میں اضافے اور قومی آمدن میں کمی کی دوہری تلوار سے عوام کا معاشی قتل عام کر رہی ہے۔

 شہباز شریف نے کہا کہ مہنگے ترین ایندھن سے بجلی بنا کر مافیاز کی جیبیں بھرنے والی حکومت کے خلاف ٹرانسپرنسی انٹرنیشنل کا سروے تازہ چارج شیٹ ہے۔

پاکستان مسلم لیگ (ن) کے صدر اور قائد حزب اختلاف شہباز شریف نے مزید کہا کہ مہنگی ترین ایل این جی سے پہلے ہی قوم کو بے دردی سے لوٹا جا رہا ہے، یہ حکومت نہیں بلکہ اندھیر نگری چوپٹ راج ہے، اس سے نجات میں ہی ملک اور قوم کی حیات ہے۔

یاد رہے اس سے قبل نیشنل الیکٹرک پاور ریگولیٹری اتھارٹی(نیپرا) نے بجلی کی قیمت  میں فی یونٹ 4 روپے 74 پیسے اضافے کا نوٹیفکیشن جاری کیا ہے۔

جاری کردہ نوٹیفکیشن کے مطابق بجلی اکتوبر کی فیول پرائس ایڈجسٹمنٹ کے تحت مہنگی کی گئی ہے ۔صارفین سے اضافہ دسمبر کے بجلی بلوں میں وصول کیاجائے گا۔

نوٹیفکیشن میں مزید کہا گیا ہے کہ اضافے کا اطلاق لائف لائن اور کے الیکٹرک صارفین پر نہیں ہوگا۔