ایمازون پرائم ویڈیو نے پیر 20 دسمبر کو اعلان کیا  تھا کہ وہ خصوصی طور پر کرکٹ میچزکی نشریات شروع کرے گا۔

تفصیلات کے مطابق او ٹی ٹی  پلیٹ فارم نے نیوزی لینڈ کرکٹ کے ساتھ شراکت کا اعلان کیا ہے اور وہ جنوری 2022 سے میچوں کو لائیو اسٹریم کرے گا۔

 نومبر 2020 میں ایمازون بھارت  میں پہلی اسٹریمنگ سروس بن گئی جس نے کسی بڑے کرکٹ بورڈ سے میچ ا سٹریمنگ کے خصوصی حقوق حاصل کئے ہیں۔

 بھارت  میں ناظرین بھارت  کی مردوں کی کرکٹ ٹیم اور خواتین کی کرکٹ ٹیم کے اگلے سال نیوزی لینڈ کے دوروں کو بھی دیکھ سکیں گے۔

ایک پریس ریلیز کے ذریعے ایمازون نے اعلان کیا کہ اب وہ اپنے پرائم ویڈیو پلیٹ فارم پر یکم جنوری 2022 سے شروع ہونے والے کرکٹ میچوں کو لائیو اسٹریم کرے گا۔

میچز لائیو کرکٹ کے لیے کیروسل پر نظر آئیں گے یا صارفین سرچ بار میں “نیوزی لینڈ کرکٹ” تلاش کر سکتے ہیں۔ میچز ویب سائٹ، موبائل ایپ، اسمارٹ ٹی وی، سیٹ ٹاپ باکس، فائر ٹی وی اسٹکس اور دیگر ہم آہنگ آلات پر دیکھے جا سکتے ہیں۔

نومبر 2020 میں ویڈیو اسٹریمنگ پلیٹ فارم نے نیوزی لینڈ میں کھیلے جانے والے بین الاقوامی مردوں اور خواتین کے کرکٹ میچوں کو اسٹریم کرنے کے لیے نیوزی لینڈ کرکٹ کے ساتھ ایک کثیر سالہ معاہدہ کیاہے۔

پہلا میچ جو اسٹریم کیا جائے گا وہ نیوزی لینڈ اور بنگلہ دیش کے درمیان ٹیسٹ سیریز کا ہوگا، یہ میچ یکم جنوری 2022 کو شروع ہوگا۔پرائم ویڈیو مختلف قسم کے کرکٹ پروگرامز، پچھلے میچوں کی جھلکیاں اور حال ہی میں ختم ہونے والے میچوں کی جھلکیاں بھی دکھائے گا۔

ناظرین فروری 2022 میں جنوبی افریقہ کے نیوزی لینڈ کے دورے، مارچ 2022 میں آسٹریلیا کے نیوزی لینڈ کے دورے کے ساتھ ساتھ مارچ،اپریل 2022 میں نیدرلینڈ کے دورے کو بھی اسٹریم کر سکیں گے۔