نیوزی لینڈ میں شہری نے ویکسی نیشن پر حکومت کی جانب سے مقرر کردہ انعامی رقم حاصل کرنے کے لیے ایک ہی دن میں کورونا ویکسین کی دس خوراک لگوالیں۔

حکومت نے کچھ عرصے قبل ایسے شہریوں کو کورونا ویکسی نیشن کروانے کے لیے نقد رقم بطور انعام دینے کی اسکیم متعارف کرائی تھی، جو کہ ریکارڈ میں تو اپنا نام ویکیسی نیٹڈ شہری کے طور پر درج کروانا چاہتے تھے، لیکن ویکسی نیشن کروانے میں تذبذب کا شکار تھے۔

اس اسکیم کے تحت ویکیسی نیشن مرکز پر ویکسیین لگوانے والے فرد کو حکومت کی جانب سے  فوراً ادائیگی کی جاتی ہے، جب کہ اس اسکیم کے تحت ویکسین لگوانے والے فرد کو اپنی شناخت بھی ظاہر نہیں کرنی پڑتی۔

اس حکومتی اسکیم سے مالی فائدہ اٹھانے کے لیے مذکورہ شہری ( شناخت ظاہرنہیں کی گئی) نے ایک  یا دو نہیں بلکہ ایک ہی دن میں ویکسین کی 10 خوراک لگوا لی۔ اس مقصد کے لیے اس نے ایک ہی دن میں مختلف ویکسی نیشن مراکز کا دورہ کیا۔

نیوزی لینڈ کے پروگرام گروپ مینیجر برائےکووڈ-19 ویکسین اینڈ امیونائزیشن ایسٹرڈ کورنیف نے اس واقعے کی تصدیق کرتے ہوئے کہا ہے کہ ’ ہم اس معاملے کی مکمل چھان بین کر رہے ہیں، ہمیں اس صورت حال پر بہت تشویش ہے اور آئندہ اس طرح کے کسی واقعے کی روک تھام کے لیے متعلقہ حکام کے ساتھ مل کر کام کر رہے ہیں۔‘ ان کا مزید کہنا تھا کہ ’ اگر آپ کسی ایسے فرد کو جانتے ہیں جس نے تجویز کردہ خوارک سے زیادہ ویکسین لگوائی ہے تو اسے فوراً طبی امداد کے لیے رجوع کرنا چاہیے۔‘

آکلینڈ یونیورسٹی کی ایسوسی ایٹ پروفیسر اور امیونولوجسٹ (قوت مدافعت کا علم رکھنے والے ماہر) ہیلین پیٹوسسز ہیرس نے نے مذکورہ فرد کو ’ خود غرض ترین ‘ قرار دیتے ہوئے کہا ہے کہ اس طرح کی حرکت ممکنہ طور پر دوسرے افراد کے لیے نقصان دہ ہوسکتی ہے۔

میلیگھن انسٹی ٹیوٹ کے ڈائریکٹر گراہم لی گروس نے اس اسکیم کو احمقانہ اور خطرناک قرار دیتے ہوئے کہا ہے کہ 10 خوراک لگوانے والا اور اسے ادائیگی کرنے والے دونوں ہی احمق ہیں، اگر چہ وہ دس خوراک لینے کے بعد موت سے ہم کنار تو نہیں ہوگا لیکن اس کا بازو ضرور سوج گیا ہوگا۔