شاہ محمود قریشی نے کہا ہے کہ یونان میں مقیم پاکستانی معاشی ترقی میں اپنا مثبت کردار ادا کررہے ہیں۔

سبکدوش ہونے والے یونانی سفیر آندریاس پاپاستاورو نے وزارتِ خارجہ میں وزیر خارجہ مخدوم شاہ محمود قریشی سے الوداعی ملاقات کی جس میں وزیر خارجہ نے کورونا وبائی پابندیوں کے دوران 600 کے قریب پاکستانیوں کی یونان واپسی میں سہولت فراہم کرنے کے لیے یونانی سفیر کی کوششوں کو سراہا۔

شاہ محمود قریشی نے کہا کہ پاکستان یونان کو دو طرفہ اور یورپی یونین کے تناظر میں ایک اہم ملک سمجھتا ہے ، یونان میں مقیم  تیس ہزار کے قریب پاکستانی کمیونٹی یونان کی معاشی ترقی میں اپنا مثبت کردار ادا کر رہی ہے۔

ملاقات میں وزیر خارجہ نے پاکستان اور یونان کے درمیان تجارت اور سرمایہ کاری کے شعبوں میں تعاون بڑھانے کیلئے وفود کے تبادلوں کی ضرورت پر زور دیا۔

انہوں نے کہا کہ پاکستان اور یونان کے مابین ثقافت، تعلیم اور سیاحت کے شعبوں میں تعاون کے فروغ کے وسیع مواقع موجود ہیں۔

سبکدوش ہونے والے یونانی سفیر آندریاس پاپاستاورو نے توصیفی کلمات اور نیک خواہشات کے اظہار پر وزیر خارجہ مخدوم شاہ محمود قریشی کا شکریہ ادا کیا۔