سری لنکن شہری پریانتھا کمارا قتل کیس میں گرفتار ملزمان کوعدالت نے جسمانی ریمانڈ پر پولیس کی تحویل میں دے دیا۔

سانحہ سیالکوٹ میں سری لنکن شہری کے قتل میں ملوث مزید 18 ملزمان کو انسداد دہشتگردی کی عدالت میں پیش کیا گیا۔

انسداد دہشتگردی کی خصوصی عدالت  نے ملزمان کو 15 روزہ جسمانی ریمانڈ پر پولیس کے حوالے کر دیا ہے۔

ملزمان کو دوبارہ 28 دسمبر کو عدالت میں پیش کیا جائےگا۔

ذرائع کے مطابق سانحہ سیالکوٹ میں 34 ملزمان پہلے ہی جسمانی ریمانڈ پر ہیں۔

 متعلقہ خبر: سانحہ سیالکوٹ، گرفتار ملزمان کی تعداد 149 ہوگئی

اس کیس میں گرفتار ملزمان کی کل تعداد 149 ہوگئی ہے جبکہ مرکزی ملزمان کی کل تعداد 19 ہے، جن سے معاملے کی تفتیش کی جا رہی ہے۔

پنجاب پولیس کی جانب سے سی سی ٹی وی فوٹیج اورموبائل کالز کے ڈیٹا کی مدد سے ان مرکزی ملزمان کو گرفتار کیا گیا۔

یہ بھی پڑھیں:

وزیراعظم عمران خان کا کہنا ہےکہ سانحہ سیالکوٹ نے پوری قوم کے سر شرم سے جھکا دیے ہیں۔

عمران خان نے کہا کہ ملزمان کو انصاف کے کٹہرے میں لاکر مثالی سزائیں ملنی چاہئیں ، پروسیکیوشن شواہد جمع کرکے بھرپور تیاری سے عدالت میں جائے۔

وزیراعظم عمران خان نے مزید کہا کہ ملزمان کو قرار واقعی سزا دلوانا یقینی بنایا جائے ، سانحہ سیالکوٹ نے پوری قوم کے سر شرم سے جھکا دیے ہیں