بالی ووڈ سپر اسٹار سلمان خان نے کہا ہے کہ انہیں گزشتہ روز سانپ نے ایک نہیں 3 بار کاٹا اور پھر ہم دوستوں کی طرح جدا ہوگئے۔

سلمان خان آج اپنی 56ویں سالگرہ منارہے ہیں، اس موقع انہوں نے میڈیا سے اپنی آئندہ فلموں کے حوالے سے باتیں کیں۔

دبنگ خان کو دو روز قبل اپنے فارم ہاؤس میں سانپ نے کاٹ لیا تھا، جس پر انہوں نے بتایا کہ ان کا فارم ہاؤس جنگل میں ہے، اس رات ایک کمرے میں سانپ گھس آیا تھا، بچے اسے دیکھ کر ڈر گئے، ان کا شور سن کر میں وہاں پہنچا اور میں نے سانپ کو بھگانے کے لئے لاٹھی مانگی۔

سانپ لاٹھی سے لپٹ گیا اور اسے بڑے آرام سے کمرے سے باہر لے آیا، اسی دوران سانپ لاٹھی پر میرے ہاتھ کی طرف بڑھنے لگا، خود کو بچانے کے لیے میں نے سانپ کو دوسرے ہاتھ سے پکڑا تاکہ اسے پھینک سکوں۔

متعلقہ خبر: بالی ووڈ کے دبنگ خان کو سانپ نے کاٹ لیا

دبنگ خان نے مزید بتایا کہ سانپ نے انہیں ایک نہیں 3 بار کاٹا، وہ زہریلا نہیں تھا، مجھے اسپتال لے جایا گیا جہاں مجھے سانپ کے کاٹے کا انجیکشن لگایا گیا، مجھے 6 گھنٹے تک اسپتال میں رکھا گیا ۔

سلمان خان نے مزید کہا کہ علاج کے بعد میں واپس اپنے فارم ہاؤس چلا آیا، جہاں ہم نے دیکھا کہ وہ سانپ وہیں موجود ہے، ہم اسے اٹھا کر جنگل میں واپس چھوڑ آئے۔ ہم دوستوں کی طرح جدا ہوئے، اس موقع پر میں نے سانپ کے ساتھ ایک تصویر بھی لی۔