علی زیدی نے کہا  ہے کہ سیالکوٹ واقعے سے پاکستان کا نام دنیا میں بدنام ہوا ہے۔

اپنے ایک بیان میں وفاقی وزیر علی زیدی نے سیالکوٹ میں پیش آنے والے واقعے کی شدید مذمت کی ہے۔

انہوں نے کہا کہ سیالکوٹ میں پیش آنے والا واقعہ انتہائی افسوسناک ہے، اس طرح کے افسوسناک واقعات کی دنیا میں مثال نہیں ملتی۔

وفاقی وزیرکا کہنا تھا کہ سیالکوٹ واقعے سے پاکستان کا نام دنیا میں بدنام ہوا ہے، اس واقعے کی جتنی مذمت کی جائے کم ہے۔

 علی زیدی نے کہا کہ ریاست نے واقعے پر ایکشن لیتے ہوئے مرکزی ملزم سمیت 100 سے زائد افراد گرفتار کیے ہیں۔

وفاقی وزیر نے کہا کہ  سیالکوٹ واقعے پر کوئی جواز پیش نہیں کیا جا سکتا لیکن اس سے زیادہ پر تشدد واقعات بھارت میں مسلمانوں کے ساتھ ہورہے ہیں۔

 علی زیدی کا یہ بھی کہنا تھا کہ بھارت کی ریاست ایکشن لینے کے بجائے قاتلوں کی پشت پناہی کرتی ہے۔

 وفاقی وزیر علی زیدی کا مزید کہنا تھا کہ بھارت میں ہونے والے مظالم پر انٹرنیشنل میڈیا کیوں خاموش ہے؟ سیالکوٹ واقعے کو ایک طرف رکھ کر انٹرنیشنل میڈیا کو بھارت کا بھی اصل چہرہ دکھانا چاہیے۔

یاد رہے کہ پنجاب کے شہر سیالکوٹ میں ایک انتہائی افسوس ناک واقع پیش آیا تھا جہاں توہین مذہب اور گستا خی پر نجی فیکٹری راجکو انڈسٹری کے جنرل مینیجر کو مشتعل ہجوم نے تشدد کر کے قتل  کر دیا جس کے بعد اس کی لاش کو آگ لگا دی تھی۔

مظاہرین نے تشدد کرتے وقت لبیک لبیک کے نعرے لگائے جبکہ مشتعل افراد نے فیکٹری کا بھی گراؤ کرلیا اور وزیر آباد روڈ ٹریفک کے لئے بند کردیا تھا۔

 سیالکوٹ پولیس کا واقعے کے حوالے سے کہنا تھا کہ ہلاک ہونے والے شہری کی شناخت پریا نتھا کمارا کے نام سے ہوئی ہے۔ یہ سیالکوٹ کے وزیر آباد روڈ پر واقع ایک نجی فیکڑی میں بحثیت ایکسپورٹ مینیجر کے خدمات انجام دے رہے تھے۔

اسپتال ذرائع کا کہنا ہے کہ ان کے پاس ایک انتہائی بری طرح جلی ہوئی لاش لائی گئی ہے جو پوری طرح راکھ بن چکی ہے۔