بین الاقوامی سطح پر پائیدار ٹرانسپورٹ ایوارڈ کیلئے بی آر ٹی پشاور کو اعزازی تذکرہ کے طور پر تسلیم کیاگیا ہے۔

وفاقی وزیراطلاعات ونشریات فواد چوہدری نے سماجی رابطے کی ویب سائٹ ٹوئٹر پر جاری اپنے پیغام میں اس اعزاز کے بارے میں آگاہ کرتے ہوئے خوشی کا اظہار کیا۔

#BRTPeshawer pic.twitter.com/2gsq5YYbE1

— Ch Fawad Hussain (@fawadchaudhry) December 2, 2021

واضح رہےکہ بی آر ٹی پشاور کو ایک کامیاب اور بہترین سفری سہولت کیلئے بین الاقوامی سطح پر اعزاز سے نوازا گیا ہے۔

ترجمان ٹرانس پشاور کے مطابق بین الاقوامی سطح پر پائیدار ٹرانسپورٹ ایوارڈ کیلئے بی آر ٹی پشاور کو اعزازی تذکرہ کے طور پر تسلیم کیا گیا۔

 ترجمان ٹرانس پشاور نے بتایاکہ اس اعزازی تذکرہ اور ایوارڈ کی دوڑ میں بھارت اور امریکہ سمیت 31 ممالک بھی شریک تھے۔

31 ملکوں کی نامزدگی میں پاکستان اور بی آر ٹی پشاور کی اعزازی تذکرہ میں نامزدگی اعزاز ہے۔

ترجمان ٹرانس پشاور کا مزید کہنا ہےکہ بی آر ٹی پشاور یومیہ 2 لاکھ سے زائد مسافروں کو بہترین سفری سہولت فراہم کر رہی ہے۔

پشاور بی آر ٹی منصوبہ کیا ہے؟

بی آر ٹی منصوبے کے تحت  پشاور میں عوام کے لیے لاہور، اسلام آباد اور ملتان کے میٹرو بس منصوبوں کی طرز پر آرام دہ سفری سہولت فراہم کی گئی ہے۔

اس منصوبے کے تحت پشاور شہر کے بیچوں بیچ 27 کلومیٹر طویل خصوصی ٹریک تعمیر کیا گیا ہے جو پشاور شہر کے اہم علاقے کارخانو بازار سے شروع ہو کر چمکنی کے علاقے تک جاتا ہے۔

پشاور بی آر ٹی منصوبے کو چلانے اور دیکھ بھال کے لیے صوبائی حکومت نے ٹرانس پشاور نامی ریپڈ ٹرانسپورٹ اتھارٹی کا قیام کیا ہے۔

اس منصوبے کے تحت شہر میں سات روٹس پر بسیں چلائی جارہی ہیں۔