چیف سیکرٹری پنجاب کامران علی افضل نے ایڈیشنل چیف سیکرٹری سید علی مرتضیٰ کے ہمراہ لاہور میوزیم کا دورہ کیا ہے۔

تفصیلات کے مطابق چیف سیکرٹری نے میوزیم کی عمارت کی تعمیر و مرمت کیلئے پی سی ون فوری تیار کرنے کی ہدایت کی، چیف سیکرٹری نے مختلف گیلریز میں بارش کے پانی سے خراب ہونے والی چھتوں اور دیواروں کا معائنہ کیا۔

اس موقعے پر چیف سیکرٹری کامران علی افضل کا کہنا تھا کہ میوزیم کی چھتیں ٹپکنے کے باعث نوادرات، قیمتی تاریخی فن پاروں اور اشیاء کے خراب ہونے کا امکان ہے، چھتوں کی مرمت کا کام ترجیحی بنیادوں پر شروع کروایا جائے۔

ان کا کہنا تھا کہ تاریخی اور ثقافتی ورثہ قومی اثاثہ ہے، قومی اثاثہ کا تحفظ سب کی مشترکہ ذمہ داری ہے۔

چیف سیکرٹری پنجاب کامران علی افضل نے مزید کہا کہ میوزیم کی اپ گریڈیشن کیلئے ہر ممکن وسائل فراہم کئے جائیں گے۔