لاہور ہائی کورٹ نے پنجاب ڈیزاسٹر مینجمنٹ اتھارٹی کو اسموگ آگاہی مہم کا مواد پیمرا کو فراہم کرنے کی ہدایت کردی ہے۔ 

جسٹس شاہد کریم لاہور ہائیکورٹ نے تمام ٹی وی چینلز پر اسموگ آگاہی مہم چلانے کا حکم دیتے ہوئے اپنے ریمارکس میں کہا کہ اسموگ آگاہی مہم میں کہیں بھی پنجاب حکومت کا ذکر نہ کیا جائے۔

دورانِ سماعت جسٹس شاہد کریم نے اپنے ریمارکس میں کہا کہ حکومت اکثر ایسا کرتی ہے کہ اپنا نام شامل کر لیتی ہے۔ اسموگ آگاہی مہم خاص طور پر مفاد عامہ کے لیے ہوگی۔ پنجاب ڈیزاسٹر مینجمنٹ اتھارٹی اسموگ اگاہی مہم کا مواد پیمرا کو فراہم کرے۔

لاہور ہائیکورٹ نے ون وے کی خلاف ورزی پر موٹر سائیکل سواروں کو 2 ہزار سے کم جرمانے کرنے کی میئرلاہور کی استدعا مسترد کردی۔

مئیر لاہور نے عدالت سے استدعا کی تھی کہ رکشا سوار کی روزانہ کی تنخواہ ہی 700 روپے ہے تو 2 ہزار جرمانے سے اس کا گھر نہیں چلتا۔ ایک خاتون کا نہر پر چالان کیا گیا تو وہ رو رہی تھی، میں رکا تو مجھے کہنے لگیں کہ میرے پاس 2 ہزار تو کیا 200 روپے تک نہیں ہیں۔

مئیر لاہور نے عدالت سے مذید کہا کہ عوامی نمائندہ ہونے کی حیثیت سے استدعا کرتا ہوں کہ موٹرسائیکل سواروں کو جرمانہ 2 ہزار سے کم کر کے 500 کردیا جائے۔

جسٹس شاہد کریم نے کہا کہ اس خاتون کو تب کیوں خیال نہیں آیا جب اس کا بیٹا ون وے کی خلاف ورزی کررہا تھا؟ ہم سب نے مل کر اسموگ کیخلاف کوشش کرنی ہے، پھر ہی نتائج نکلیں گے۔

عدالت نے ایل ڈی اے کے تجاوزات کیخلاف آپریشن پراظہارِ اطمینان کرتے ہوئے جمعرات کے روز پی ایس ایل ٹریفک پلان پیش کرنے کا حکم دیا۔

واضح رہے کہ آج صبح  اسموگ کے تدارک سے متعلق پیش رفت رپورٹ لاہور ہائیکورٹ میں جمع کرائی گئی۔اسموگ کے تدارک کے لیے فیکٹریوں، گاڑیوں اور اینٹوں کے بھٹوں کے خلاف کی گئی کارروائی کو رپورٹ کا حصہ بنایا گیا۔ 10 سے 27 فروری تک پی ایس ایل کرکٹ میچوں کے لیے ٹریفک پلان کے انتظامات کو بھی رپورٹ کا حصہ بنایا گیا۔