متحدہ عرب امارات کے بعد شارجہ نے بھی ملازمین کو بڑا ریلیف فراہم کرتے ہوئے ہفتہ وار چھٹیوں میں اضافہ کردیا۔

چند روز قبل یو اے ای حکومت کی جانب سے ملازمین کے لیے نیا شیڈول بنایا گیا تھا جس کے تحت انہیں ہفتہ اور اتوار کو چھٹی کے ساتھ جمعہ کو آدھی چھٹی دی گئی تھی لیکن اب شارجہ حکومت نے ملازمین کے لیے جمعہ کو بھی عام تعطیل کا اعلان کردیا۔

غیر ملک خبررساں ادارے کے مطابق شارجہ نے ملازمین کے ورک ڈے کو صرف 4 دن تک محدود کرنے کا فیصلہ کرتے ہوئے دو دن کے ویک اینڈ کے بجائے 3 دن کے ویک اینڈ کا اعلان کردیا۔

شارجہ کی ایکزیکٹو کونسل کی جانب سے یہ اعلان کیا گیا ہے کہ تمام ملازمین جمعہ ، ہفتہ اور اتوار کو کام کرنے کے بجائے چھٹی منائیں گے اور یہ فیصلہ شارجہ کے سپریم حکمران اور سپریم کونسل ممبر شیخ داکٹر سلطان بن محمد القاسمی کی منظوری کے بعد کیا گیا ہے۔

شارجہ حکام کی جانب سے کہا گیا کہ ملازمین کو ریلیف فراہم کرنے کے لیے ویک اینڈ بڑھانے کا فیصلہ متحدہ عرب امارات کے مخلتف شعبوں میں مسابقت بڑھانے کے وژن کے تحت کیا گیا ہے جس کا مقصد معیشت کو بڑھانا اور کاروباری ماحول فراہم کرنا ہے۔