بالی ووڈ کے معروف اداکار سنجے دت نے مداحوں سے کہا ہے کہ وہ راجکمار ہیرانی سے ’’منا بھائی 3‘‘ بنانے کی درخواست کرکے تھک چکے ہیں اب مداح ان پر دباؤ ڈالیں۔

بالی ووڈ اداکار سنجے دت کی 2003 میں ’منا بھائی ایم بی بی ایس‘ اور2006 میں ’لگے رہو منا بھائی‘ کی زبردست کامیابی کے بعد ’منا بھائی 3‘ کی تیاری کے بارے میں کافی توقعات وابستہ ہیں۔

دونوں فلموں کی ہدایت کاری راجکمار ہیرانی نے کی تھی جن کا شمار بالی ووڈ کے شہرہ آفاق ہدایت کاروں میں ہوتا ہے۔

فلم میں سنجے دت اور ارشد وارسی نے ’منابھائی‘ اور ’سرکٹ‘ کا کردار ادا کیا تھا جن کو مداحوں کی جانب سے بے حد پذیرائی ملی۔

پہلی دو فلموں کی کامیابی کے بعد راجکمار ہیرانی نے ’منا بھائی چلے امریکا‘ کے نام سے تیسری فلم بنانے کا منصوبہ بنایا جن کے ٹیزربھی جاری ہوئے لیکن پراجیکٹ کہیں نہیں پہنچ سکا اور سنجے دت کی سزا اور بعد میں قید کے بعد یہ خیال یکسر منسوخ کر دیا گیا۔

2018 میں ’سنجو‘ کی ریلیز کے بعد راجکمار ہیرانی نے کہا تھا کہ وہ بہت جلد فلمیں شروع کریں گے۔

اب جب کہ منا بھائی فرنچائز کو 19 سال مکمل ہو چکے ہیں، سنجے دت نے مداحوں سے اپیل کی ہے کہ وہ ’منا بھائی 3‘ بنانے کے لیے ہیرانی پر دباؤ ڈالیں۔

بالی ووڈ اداکار نے مداحوں سے بات کرتے ہوئے کہا کہ راجکمار ہیرانی سے ’منا بھائی 3‘ بنانے کی درخواست کر کے تھک چکا ہوں۔

انہوں نے کہا کہ راجکمار ہیرانی کا تعلق ناگپور سے ہے اس لئے میں ناگپوریوں سے اپیل کرتا ہوں کہ وہ ‘منا بھائی 3’ کے لیے ان پر دباؤ ڈالیں جس پر مداحوں نے زوردار تالیاں بجائیں۔