وفاقی وزیر برائے مذہبی امور اور بین المذاہب ہم آہنگی نور الحق قادری کا کہنا ہے کہ وزیراعظم عمران خان ذاتی طور پر سانحہ سیالکوٹ کیس کی تحقیقات کی نگرانی کر رہے ہیں، واقعے کے ملزمان کو انصاف کے کٹہرے میں لایا جائے گا۔

وفاقی وزیر نور الحق قادری نے بروز پیر سفارت خانے میں سری لنکا کے ہائی کمشنر سے ملاقات کی اور سیالکوٹ میں سری لنکن شہری پریانتھا کمارا کے افسوسناک قتل پر ان کے ساتھ تعزیت کا اظہار کیا۔

اس موقع پر قومی اقلیتی کمیشن کے رکن ڈیوڈ البرٹ اور مفتی گلزار نعیمی بھی موجود تھے۔

انہوں نے سری لنکن شہری کے قتل کو پوری قوم کے لیے شرمناک فعل قرار دیتے ہوئے کہا کہ ایسا واقعہ کسی بھی معاشرے کے لیے قابل قبول نہیں، اس واقعے نے ہمیں مذہبی ہم آہنگی، رواداری اور مکالمے کے تبادلے کی اہمیت یاد دلائی ہے۔

سری لنکن ہائی کمشنر نے اس موقع پر کہا کہ پوری پاکستانی قوم اس ہولناک واقعے کے خلاف ایک پیج پر ہے اور تمام شعبہ ہائے زندگی بشمول علمائے کرام اس کی شدید مذمت کرتے ہیں۔

ہائی کمشنر نے مزید کہا کہ وزیر اعظم عمران خان ذاتی طور پر مجرموں کو انصاف کے کٹہرے میں لانے میں دلچسپی لے رہے ہیں، انہوں نے مزید کہا کہ سری لنکا کی حکومت اور عوام اس سلسلے میں حکومت پاکستان کی کوششوں سے مطمئن ہیں۔

سری لنکن ہائی کمشنر کا مزید کہنا تھا کہ دونوں ممالک گزشتہ 70 سالوں سے برادرانہ تعلقات سے لطف اندوز ہو رہے ہیں اور پاکستان نے دہشت گردی کے خاتمے میں اہم کردار ادا کیا ہے۔

قومی اقلیتی کمیشن کے رکن ڈیوڈ البرٹ اور مفتی گلزار نعیمی نے کہا کہ وہ مختلف مذہبی اور نسلی گروہوں کے درمیان ہم آہنگی کو فروغ دینے کے لیے مل کر کام کریں گے۔