الیکشن کمیشن نے صوبہ سندھ کے ہر ضلع میں یونین کونسلز، یونین کمیٹیوں/ وارڈز کی حلقہ بندیوں کیلئے پروگرام جاری کردیا ہے۔

ترجمان دفتر صوبائی الیکشن کمشنر سندھ کی جانب سے جاری کردہ بیان کے مطابق بلدیاتی انتخابات اور آئندہ عام انتخابات کی تیاریوں کے سلسلے میں الیکشن کمیشن آف پاکستان نے صوبہ سندھ کے ہر ضلع میں یونین کونسلز، یونین کمیٹیوں / وارڈز کی حلقہ بندیوں کیلئے پروگرام جاری کردیا ہے۔

الیکشن کمشنر کے مطابق 31 دسمبر 2021 سے 14 جنوری 2022 تک تمام انتظامات کی تکمیل بشمول نقشوں اور متعلقہ ڈیٹا کے حصول کو یقینی بنایا جائے  گا، 17 جنوری 2022 سے 15 فروری 2022 تک یونین کونسل، یونین کمیٹیوں / وارڈ کی حلقہ بندی کی ابتدائی فہرست کی تیاری کی جائے گی۔

الیکشن کمشنر کا کہنا تھا کہ 16 فروری 2022 یونین کونسلز، یونین کمیٹیوں / وارڈز کی ابتدائی فہرست کی اشاعت ہوگی جبکہ 17 فروری 2022 سے 4 مارچ 2022 تک حلقہ بندیوں پر اعتراضات جمع کروائی جاسکیں گی۔

الیکشن کمشنر نے کہا کہ حلقہ بندی حکام کی طرف سے نمائندگیوں اور اعتراضات کو 21 مارچ 2022 تک نمٹانا ہوگا، 22 مارچ 2022 کو حلقہ بندی اتھارٹیز کے فیصلوں کو حلقہ بندی کمیٹیوں تک پہنچانے کی آخری تاریخ ہوگی۔

الیکشن کمشنر کے مطابق 24 مارچ 2022 کو حلقہ بندی کمیٹیوں کے ذریعے یونین کونسلوں، یونین کمیٹیوں/ وارڈوں کی حتمی فہرست کی اشاعت ہوگی۔