اقوامِ متحدہ کے ذیلی ادارے یونیسف کی رپورٹ کے مطابق کورونا وبا کے دوران جنوبی ایشیا کے 40 کروڑ سے زائد بچوں کی تعلیم بری طرح متاثر ہوئی ہے۔

امریکی خبر ایجنسی کے مطابق اقوامِ متحدہ کے ذیلی ادارے یونیسف نے اپنی رپورٹ میں کہا ہے کہ دنیا بھر کے برعکس کورونا وبا کے دوران جنوبی ایشیا میں تعلیمی اداروں کی بندش کا دورانیہ طویل رہا ہے۔

جنوبی ایشیا کے اکثر ممالک میں کم و بیش 32 ہفتوں تک تعلیمی ادارے بند رہے، جس سے بچوں کی تدریسی سرگرمیاں شدید متاثر ہوئیں۔ جدید سہولیات میسر نہ ہونے کی وجہ سے طلبہ تعلیم سے دور ہوئے۔

رپورٹ میں کہا گیا ہے کہ تعلیمی سرگرمیاں محدود ہونے کے اثرات کئی دہائیوں تک رہیں گے کیونکہ خطے کے بچے سیکھنے کے عمل میں پہلے ہی پیچھے ہیں۔

اقوام متحدہ کی رپورٹ میں اس بات کا بھی انکشاف ہوا کہ تعلیمی اداروں کی بندش سے بچوں کے مقابلے میں بچیوں کا زیادہ نقصان ہوا ، کیونکہ جہاں ان پر گھر میں کام کا دباؤ تھا وہیں ان کی موبائل فون اور انٹر نیٹ تک رسائی بھی محدود تھی۔

رپورٹ میں بتایا گیا ہے کہ بھارت میں کورونا وبا سے تیسری جماعت کے 42 فیصد بچے پہلی جماعت کی سطح کا تعلیمی متن پڑھ سکتے تھے جو 2020 میں کم ہوکر 24 فیصد ہوگیا ہے۔