انڈونیشیا میں شدید زلزلے کے بعد سونامی الرٹ جاری کردیا گیا ہے۔

غیر ملکی خبر ایجنسی کے مطابق انڈونیشیا کے مشرقی صوبے نوسیٰ سنگارا میں زلزلے کے شدید جھٹکے محسوس کئے گئے۔

زلزلہ اس قدر شدید تھا لوگ اپنے گھروں سے باہر نکل آئے، انڈونیشیا کے حکام نے عوام سے اپیل کی ہے کہ وہ گبھراہٹ کا شکار ہونے کے بجائے محفوظ مقام پر منتقل ہوجائیں۔

امریکی زلزلہ پیما مرکز کے مطابق زلزلے کی شدت ریکٹر اسکیل پر 7.4 ریکارڈ کی گئی ہے، زلزلے کا مرکز انڈونیشیا سے ملحقہ بحیرہ فلورس میں تھا اور اس کی گہرائی صرف ساڑھے 18 کلومیٹر تھی۔

متعلقہ خبر: انڈونیشیا میں آتش فشاں پھٹنے سے ہزاروں افراد کی نقل مکانی

بحر اوقیانوس سونامی وارننگ سینٹر نے کہا ہے کہ زلزلے کے مرکز کے اطراف ایک ہزار کلومیٹر کے علاقے میں سونامی کا خطرہ ہے۔

انڈونیشیا میں جغرافیائی محل و وقوع کے باعث زلزلے اور آتش فشاں پھٹنے کے مسلسل واقعات ہوتے رہتے ہیں۔

متعلقہ خبر: انڈونیشیا میں زلزلہ، شدت 6.1 ریکارڈ

2018 میں آنے والے زلزلے سے انڈونیشیا میں 550 افراد جاں بحق ہوئے تھے۔

2004 میں بحر الکاہل میں زلزلے اور اس کے بعد آنے والے سونامی نے سب سے پہلے انڈونیشیا کو ہی متاثر کیا تھا، اس قدرتی آفت کے نتیجے میں دنیا بھر میں 2 لاکھ 20 ہزار انسان لقمہ اجل بنے تھے جن میں سے صرف انڈونیشیا میں ایک لاکھ 70 ہزار ہلاکتیں ہوئی تھیں۔