حال ہی میں 2021 کی مِس یونیورس نے بالی ووڈ کے ساتھ ہالی ووڈ میں کام کرنے کی خواہش ظاہر کردی۔

غیر ملکی خبر رساں ادارے کے مطابق ہرناز سندھو جو پہلے ہی چند پنجابی فلموں میں کام کر چکی ہیں۔

تاہم اب وہ ناصرف ہندی سنیما میں بلکہ ہالی ووڈ میں بھی اپنے لیے جگہ بنانے کی منتظر ہیں۔

مِس یونیورس 2021 کا ٹائٹل جیتنے کے بعد ہرناز سندھو نے اپنے ایک انٹرویو میں کہا کہ یہ پورے بھارت کے لیے ایک بہت بڑا جشن ہے کیونکہ ایک بھارتی خاتون کو 21 سال بعد یہ تاج پہننے کا موقع ملا ہے۔

ہرناز سندھو نے کہا کہ میں بہت شکر گزار محسوس کرتی ہوں اور میرا دل ان تمام لوگوں کے لیے بہت احترام سے بھرا ہوا ہے جنہوں نے مجھ پر اپنا اعتماد ظاہر کیا اور میری محنت کو سراہا۔

اُنہوں نے کہا کہ ’میں ایک ایسے ماحول کی پرورش کرنا چاہتی ہوں جہاں ساتھی خواتین صحت اور حفظان صحت کے حوالے سے اپنے خدشات کا اظہار کرنے میں آسانی محسوس کریں۔‘

ہرناز سندھو نے اپنے فلمی کیرئیر کے حوالے سے کہا کہ ’میں ناصرف بالی ووڈ بلکہ ہالی ووڈ کا بھی حصہ بننا پسند کروں گی اور اس کے ذریعے میں دقیانوسی تصورات کو توڑنا پسند کروں گی۔‘

اُنہوں نے مزید کہا کہ ’میرے خیال میں 21ویں صدی کے لوگ فلموں اور ویب سیریز سے متاثر ہوتے ہیں، اس لیے میں لوگوں کو متاثر کرنا چاہوں گی اور ان مسائل کے بارے میں بات کرنے کی کوشش کروں گی جنہیں معاشرے سے ختم کیا جانا چاہیے۔‘

واضح رہے کہ بھارتی ریاست پنجاب سے تعلق رکھنے والی حسینہ ہرناز سندھو نے مس یونیورس 2021 کا ٹائٹل جیت کر 21 سال بعد ایک بار پھر بھارت کے نام یہ اعزاز کردیا ہے۔

ہرناز سندھو، مس یونیورس کا خطاب اپنے نام کرنے والی وہ تیسری لڑکی کا تعلق بھارت سے ہے۔

یاد رہے کہ یہ مقابلہ حسن اسرائیل کے شہر ایلات میں منعقد ہوا تھا۔

اس کے علاوہ انڈیا کے لیے لارا دتہ نے آخری بار یہ اعزاز سال 2000 میں جیتا تھا۔

ہرناز سندھو سال 2000 میں پیدا ہوئیں جب لارا دتہ نے مس ​​یونیورس کا ٹائٹل جیتا تھا۔

2020 کی مس یونیورس کی فاتح میکسیکو کی اینڈریا میزا نے ہرناز سندھو کو تاج پہنایا۔

ہرناز سندھو 17 سال کی عمر سے مقابلہ حسن میں حصہ لے رہی ہیں۔

انڈین ریاست پنجاب سے تعلق رکھنے والی 21 سالہ ہرناز سندھو نے پیراگوئے کی نادیہ فریرا اور جنوبی افریقہ کی لالیلا مسوانے کو شکست دے کر ٹائٹل جیتا۔

ہرناز سندھو نے کہا کہ میں اس سفر میں رہنمائی اور مدد کرنے کے لیے خدا، اپنے خاندان اور مس انڈیا تنظیم کی شکر گزار ہوں۔

ٹاپ تھری راؤنڈز کے دوران مقابلے کے شرکا سے پوچھا گیا کہ وہ آج کے دور میں دباؤ کا سامنا کرنے والی نوجوان خواتین کو کیا مشورہ دینا چاہیں گی تاکہ وہ اس سے نمٹ سکیں

ہر ناز سندھو نے کہا کہ آج کل کے نوجوانوں پر سب سے بڑا دباؤ خود پر یقین کرنا ہے۔

انہوں نے کہا کہ دوسروں سے اپنا موازنہ کرنا چھوڑ دیں اور پوری دنیا میں کیا ہو رہا ہے اس کے بارے میں بات کرنا بہت ضروری ہے۔

ٹاپ فائیو راؤنڈ میں ہرناز سے موسمیاتی تبدیلی سے متعلق سوال پوچھا گیا کہ زیادہ تر لوگ موسمیاتی تبدیلی کو ایک دھوکہ سمجھتے ہیں، آپ انہیں قائل کرنے کے لیے کیا کریں گی؟

ہرناز سندھو کا کہنا تھا کہ ماحولیاتی تبدیلی کے لیے روک تھام کرنا افسوس کرنے اور مرمت کرنے سے بہتر ہے۔

واضح رہے کہ سندھو سے پہلے صرف دو ہندوستانیوں نے مس ​​یونیورس کا خطاب جیتا ہے۔ سشمیتا سین نے پہلی بار 1994 میں اور لارا دتہ نے دوسری بار سال 2000 میں یہ خطاب جیتا تھا۔