پولیس حکام کے سندھ بلڈنگ کنٹرول اتھارٹی کے آفس پر چھاپے کے دوران سرکاری افسران خوف کا شکار ہوگئے۔

تفصیلات کے مطابق گذشتہ روز نسلہ ٹاور کے ذمے دار سرکاری افسران کے خلاف عدالتی احکامات پر مقدمے کے اندراج کے بعد آج  ایس ایس پی انویسٹی گیشن ایسٹ الطاف حسین کی سربراہی میں پولیس کی تفتیشی ٹیم ایس بی سی اے عمارت کے اندر داخل ہوئی جنھیں دیکھتے ہی سرکاری افسران وملازمین خوف کا شکار ہوئے۔

چھاپے کے دوران پولیس حکام نے منظور کاکا سمیت تمام افسران سے متعلق معلومات حاصل کیں۔

اس موقع پرایس ایس پی انویسٹی گیشن ایسٹ الطاف حسین نے میڈیا کے نمائندوں کو بتایا کہ فیروزآباد تھانے میں درج معاملے پر اصل ذمہ د اران کا تعین کریں گے۔ عدالتی احکامات پر کٹنے والی ایف آئی آر میں ذمہ داران کو گرفتار کیا جائیگا۔

الطاف حسین نے کہا کہ ممکنہ طور پر تفتیشی حکام ماسٹر پلان سمیت دیگر شعبہ جات کے افسران سے بھی پوچھ گچھ کریں گے۔ دیگرمحکموں کےخلاف بھی کارروائی کریں گے۔ ڈی جی ایس بی سی اے و دیگرحکام سےدستاویزات لی ہیں۔ ہم نےمزید دستاویزات مانگی ہیں، تاہم ابھی تک کوئی گرفتاری نہیں ہوئی ہے۔

ایس ایس پی انوسٹی گیشن ایسٹ کا کہنا تھا کہ سندھی مسلم سوسائٹی سے بھی ریکارڈ حاصل کیا جارہا ہے۔ ڈی جی ایس بی سی اے، ڈائریکٹر ایڈمن، ڈائریکٹر ڈیزائن سے پوچھ گچھ کی ہے۔

واضح رہے کہ سپریم کورٹ کے احکامات کے بعد ڈی آئی جی ایسٹ مقدس حیدر نے نسلہ ٹاورکے ذمے داران کے خلاف کارروائی کے لیے پولیس کی پانچ رکنی تحقیقاتی ٹیم بنائی۔ تحقیقاتی ٹیم فیروز آباد میں درج مقدمے کی شفاف تحقیقات کرے گی۔ تحقیقاتی ٹیم کے انچارج ایس ایس پی ایسٹ انوسٹیگیشن الطاف حسین ہیں۔

کمیٹی ممبران میں ایس پی جمشید ڈویژن فاروق بجرانی، ڈی ایس پی یوسف جمال، انسپکٹر خوشنود انسپکٹرنثاراحمد شامل ہیں۔ تحقیقاتی کمیٹی سپریم کورٹ کے حکم پر فیروزآباد میں نسلہ ٹاور کے ذمہ داران کے خلاف مقدمہ کے اندراج کے بعد کی تحقیقات کر رہی ہے۔

پولیس کے بعد اینٹی کرپشن کا چھاپہ

پولیس کے بعد سندھ بلڈنگ کنٹرول اتھارٹی پر اینٹی کرپشن حکام نے بھی چھاپہ مارا۔ دو روز میں اینٹی کرپشن کا یہ دوسرا چھاپہ ہے۔ گذشتہ روز بھی اینٹی کرپشن نے بلڈنگ کنٹرول اتھارٹی میں پوچھ گچھ کی گئی تھی۔

 بلڈنگ کنٹرول اتھارٹی حکام نے نسلہ ٹاور کیس میں ملوث افسران و اہلکاروں کی تفصیلات فراہم کرنے کے لیے مہلت مانگی تھی۔ اینٹی کرپشن کی دو ٹیمیں نسلہ ٹاور کیس کی تحقیقات کررہی ہیں۔