مشہور فٹ بال لیگ انگلش پریمئیر لیگ کا اتوار کو کھیلا جانے والا ایک اور میچ  کورونا کے باعث ملتوی ہو گیا۔

انگلش فٹ بال کلب ساؤتھمپٹن اور نیو کاسٹل کے مابین ہونے والا میچ کورونا کے نئے کیسز سامنے آنے کے بعد کیا گیا ہے۔

یہ میچ اتوار کو شیڈول تھا مگر نیو کاسٹل یونائیٹڈ کے کیمپ میں مزید نئے کورونا کیسز رپورٹ ہونے کے بعد میچ ملتوی کر دیا گیا۔

نیو کاسٹل کا ایورٹن کے ساتھ جمعرات کو ہونے والا میچ بھی کورونا کے باعث منسوخ کیا گیا تھا۔

انگلش پریمئیر لیگ میں رواں ماہ کے دوران 17 میچز کورونا کے باعث ملتوی کئے گئے ہیں۔

پریمئیر لیگ انتظامیہ کے مطابق نیو کاسٹل کلب کی انتظامیہ نے درخواست کی تھی کہ میچ ملتوی کیا جائے کیونکہ ہمارے پاس اب میدان میں گیارہ کھلاڑی اتارے کی بھی صلاحیت نہیں رہی۔

پریمئیر لیگ انتظامیہ نے نیو کاسٹل کی درخواست منظور کر لی ہے۔

لیور پول فٹ بال کلب کے مینجر جرگین کلاپ بھی چیلسی کے ساتھ اتوار کو ہونے والے میچ کے بارے میں خدشات کا شکار ہیں۔

لیور پول کلب نے حال ہی میں اپنے کھلاڑیوں کا پی سی آر ٹیسٹ کرایا ہے جس کا رزلٹ آنے والا ہے۔

مینجر جرگین کلاپ نے کہا ہمارے کیمپ میں کورونا کے تین نئے کیسز ہیں جبکہ کچھ اسٹاف ممبران میں بھی کیسز رپورٹ ہوئے ہیں جو افسوسناک خبر ہے۔