وفاقی وزیر اقتصادی امور عمر ایوب کابینہ کی اقتصادی رابطہ کمیٹی کی سربراہی کے بعد اب کابینہ کی نجکاری و سرکاری ملکیتی اداروں کی کمیٹیوں سے بھی باہر ہوگئے ہیں۔

وزیر اعظم نے کابینہ کی نجکاری و سرکاری ملکیتی اداروں کی کمیٹوں کی تشکیل نو کردی ہے، اس حوالے سے باقاعدہ نوٹی فکیشن بھی جاری کردیا گیا ہے۔

نوٹی فکیشن کے مطابق وفاقی وزیر خزانہ شوکت ترین کابینہ کی نجکاری و سرکاری ملکیتی اداروں کی کمیٹیوں کے چیئرمین ہوں گے۔

متعلقہ خبر: کابینہ کی اقتصادی رابطہ کمیٹی کی تشکیل نو

کمیٹیوں کے ارکان میں توانائی، مواصلات،صنعت و پیداوار، قانون اور منصوبہ بندی کے محکموں کے وزیر شامل ہوں گے۔

دونوں کمیٹیوں کی سربراہی اس سے قبل وفاقی وزیر اقتصادی امور عمر ایوب کررہے تھے تاہم اب عمر ایوب دونوں کمیٹیوں میں رکن بھی نہیں رہے۔

گزشتہ دنوں وفاقی وزیر عمر ایوب کو چیئرمین اقتصادی رابطہ کمیٹی کی سربراہی سے بھی ہٹایا گیا ہے۔

واضح رہے کہ عمر ایوب کو چند ماہ قبل شوکت ترین کے مشیر خزانہ کے بننے کے بعد عمر ایوب کو کمیٹیوں کا چیئرمین بنایا گیا تھا۔

اس حوالے سے ذرائع کا کہنا ہے کہ عمر ایوب کو عبوری مدت کے لیے یہ عہدے تفویض کئے گئے تھے، شوکت ترین کے وزیر خزانہ بننے کے بعد انہیں ان کمیٹیوں کی سربراہی دوبارہ سونپ دی گئی ہے۔