اسلام آباد: ہلالِ احمر پاکستان کے قیام کی 74 ویں سالگرہ پر نیشنل ہیڈکوارٹرز رنگا رنگ تقریب ہوئی، اس موقع پر مختلف سٹال بھی لگائے گئے۔

تقریب میں ہلالِ احمر پاکستان کے تاریخی پس ِ منظر، خدمت ِ انسانیت کے مختلف پروگرام، سرگرمیوں سے متعلق دستاویزی فلم بھی دکھائی گئی۔

تقریب کا باقاعدہ آغاز تلاوت ِ کلامِ پاک سے ہوا۔ شرکاء تقریب کیلئے ہلالِ احمر کی سرگرمیوں پر مبنی تصاویری گیلری بھی سجائی گئی تھی۔

اِس موقع پر ہلالِ احمر کے تربیت یافتہ فرسٹ ایڈ ر نے ابتدائی طبّی امداد دینے کا عملی مظاہرہ بھی کرکے دکھایا، جسے شرکاء نے تالیوں کی گونج میں سراہا۔ تقریب میں موومنٹ پارٹنرز، ہلالِ احمر کے افسران و رضاکار بھی شریک تھے۔

تقریب سے خطاب کرتے ہوئے چیئرمین ہلالِ احمر جناب ابرارالحق کا کہنا تھا کہ20 دسمبر 1947 سے لے کر آجتک، ہلالِ احمر انسانیت،  بلاتفریق،  غیر جانبداری،  خودمختاری،  رضاکارانہ خدمات،  اتحاد،  عالمگیریت پرمبنی سات بنیادی اُصولوں کی پاسداری کرتے ہوئے بلارنگ ونسل، بلا امتیاز انسانیت کی خدمت جاری رکھے ہوئے ہے۔

انہوں نے کہا کہ سانحات، قدرتی آفات، حادثات کے شکار لاکھوں لوگوں کی دِلجوئی کر چکا ہے، ابتدائی طبّی امداد، نفسیاتی امداد ہو یا بچھڑے ہوئے لوگوں کو آپس میں ملانے کی کوشش، ہنگامی صورتحال میں مدد ہو یا تعمیر نو بحالی میں کردار، ہلالِ احمر پیش پیش رہتا ہے۔

ان کا کہنا تھا کہ کورونا وباء کے دوران ”فرنٹ لائن“ پر رہ کر نام کمانے والے ہلالِ احمر کے طریقہ خدمت کو امریکہ جیسے ملک میں پذیرائی ملنا کسی اعزاز سے کم نہیں۔15دِنوں میں مکمل ہسپتال، محافظ فورس کے ذریعے لاکھوں لوگوں کی اعانت و خدمت، رضاکاروں کی بدولت مؤثر، نتیجہ خیز آگاہی مہم، ماس ویکسی نیشن سنٹر کا درجہ پانا اور لاکھوں لوگوں کو ویکسی نیشن کے علاوہ گھر گھر جا کر ویکسین لگانے کی مہم اب بھی جاری ہے۔

ابرارالحق نے بتایا کہ نقد امداد، راشن، پرسنل پروٹیکشن کِٹس، ہائیجین کِٹس، ہینڈ واشنگ سٹیشن اور سیناٹائزر مشینوں کی فراہمی میں ہلالِ احمر اپنا لوہا منوا چکا ہے۔

ابرار الحق نے موومنٹ پارٹنرز، انٹرنیشنل کمیٹی، انٹرنیشنل فیڈریشن سمیت تمام دیگر معاون اداروں کا شکریہ ادا کیا۔

انہوں نے اِس امر کا اظہار کیا کہ ملک بھر میں رضاکاروں کا نیٹ ورک، یوسی سطح پر موجودگی، تربیت سے لیس نوجوان اور ہر گھر میں فرسٹ ایڈرکا خواب تعبیر پانے کو ہے۔وفاقی نظامت ِ تعلیمات کے اشتراک سے تعلیمی اداروں میں ”ریڈکریسنٹ کور“ کا قیام عمل میں لایا جارہا ہے جو انسانی خدمت کے اداروں کیلئے معاون اور ہلالِ احمر کا ہر اوّل دستہ ہوگا۔

انہوں نے عطیہ خون کی مہم کے دوران اراکین پارلیمنٹ کی جانب سے خون عطیہ کرتے وقت پہلے پہل ڈپٹی سپیکر قاسم سوری کی جانب سے خون کا عطیہ دینے پر بھی شکریہ ادا کیا۔

تقریب سے خطاب کرتے ہوئے قومی اسمبلی کے ڈپٹی سپیکر جناب قاسم خان سوری نے کہا کہ ہلالِ احمر نے اِنسانیت کی خدمت کو اوّلیت دے کر نام کمایا ہے، میں 74 برس کی کامیابی پر مبارکباد دیتا ہوں، ادارہ ابرار الحق جیسے دردِ دل رکھنے والی شخصیت کی سربراہی میں خدمت ِ انسانیت کا سفر جاری رکھے گا۔ خون کے عطیات جمع کرنے اور بروقت مستحق لوگوں کو فراہمی ہلالِ احمر کا طرہ امتیاز ہے۔

انہوں نے اپنی جانب سے ہر ممکن تعاون کی یقین دہانی کراتے ہوئے کہا کہ ہلالِ احمر کو جو بھی تعاون درکار ہوا بلا جھجھک کریں گے۔74 ویں سالگرہ تقریب میں فرسٹ ایڈ، یوتھ اینڈ والینٹئرز، میڈ یا اینڈ کمیونیکیشن، ریجنل بلڈ ڈونر سنٹر،پروگرام برائے خاندانی روابط کی بحالی، مائین رِسک ایجوکیشن کی جانب سے سٹال بھی لگائے گئے تھے۔

اس موقع پر جِل بینڈ نے اپنے فن کا بھی مظاہرہ کیا جسے شرکاء نے بھرپور داد دی۔

واضح رہے کہ 20 دسمبر 1947ء کو بانی ء پاکستان جناب قائداعظم محمد علی جناحؒ نے ایکٹ آف پارلیمنٹ کے تحت ہلالِ احمر پاکستان کے قیام عمل میں لایا تھا۔ اپنے قیام سے لے کر آج تک ہلالِ احمر پوری تندہی کے ساتھ انسانیت کی خدمت کا سفر جاری رکھے ہوئے ہے۔