اسلام آباد میں اومیکرون کیسز کا پھیلاؤ بڑھنے لگا ہے۔

تفصیلات کے مطابق اسلام آباد میں اومیکرون کے مزید 3 کیسز رپورٹ ہوئے ہیں۔

ڈسٹرکٹ ہیلتھ آفسر (ڈی ایچ او) زعیم ضیاء کا کہنا ہے کہ وفاق میں اومیکرون کے کیسز کی تعداد 20 ہو گئی ہے، اومیکرون کے مریضوں کے ساتھ ملنے اور رہنے والوں کی ٹریسنگ جاری ہے۔

    ان کا کہنا تھا کہ اسلام آباد میں اومیکرون کے پہلے کیس کی تصدیق 25 دسمبر کو ہوئی تھی، ضلعی محکمہ صحت کی ٹمیں متحرک ہیں، شہری جلد از جلد ویکسینیشن کروائیں۔

 یاد رہے کہ سال 2021 کے اختتام پر کورونا وباء کی نئی قسم ’اومیکرون‘ نے اپنا اثر دکھانا شروع کردیا ہے۔

کورونا کی اس نئی قسم کے حوالے سے عالمی ادارہ برائے صحت سمیت تمام متعلقہ اداروں نے پوری دنیا کو خبردار کردیا ہے۔

اومیکرون وائرس کے حوالے اسٹڈی کرتے ہوئے ماہرین نے انکشاف کیا ہے کہ اومیکرون کی علامات میں مستقل سر میں درد رہنا، ناک بہنا اور گلے میں خراش ہونا اس کی علامات شامل ہے۔

اس کے علاوہ مستقل تھکن اور بار بار چھیکیں اومیکرون کی شدید علامات میں شامل ہیں اور اس سے تخفظ کے لئے وہی تمام اقدامات ضروری ہیں جو کہ اس سے پہلے کی تمام قسموں کے لئے اٹھائے گئے تھے۔

اومیکرون کے بڑھتے ہوئے کیسز کی پیش نظر خدشات ظاہر کئے جارہے ہیں کہ اگر اس سے تحفظ کے لئے بروقت اقدامات نا کیے گئے تو انسانی جانوں کی صورت میں بھاری نقصان اٹھانا پڑسکتا ہے۔

خیال رہے کہ اومیکرون سے پہلے تمام قسموں میں بخار، گلے میں خراش، حسوں کی کمزوری، یادداشت پر اثر پڑنا اور دیگر صورتحال شامل  تھیں۔

اس سے تحفظ کے لئے مستقل طور پر ماسک پہننا، سماجی فاصلہ برقرار رکھنا اور مناسب غذاؤں کے استعمال سے صحت کا خیال رکھنا شامل تھا۔