کراچی میں موسمِ سرما کی پہلی بارشوں کی پیش گوئی کے بعد الرٹ جاری کر دیا گیا۔

پاکستان ڈیزاسسٹر مینجمنٹ اتھارٹی سندھ نے کراچی سمیت صوبے کے مختلف اضلاع میں ہفتے اور اتوارکو موسمِ سرما کی پہلی بارش کی پیشگوئی کے ساتھ ہی الرٹ جاری کردیا ہے۔

پی ڈی ایم اے سندھ کے مطابق کراچی، حیدرآباد، سکھر، میرپور خاص، دادو، جامشورو، لاڑکانہ ، شہید بینظیر آباد میں بارشوں کا امکان ہے۔

پی ڈی ایم اے نے بلدیاتی اداروں سمیت ضلعی انتظامیہ کو بارشوں سے نمٹنے کے لیے اقدامات کی ہدایت کردی۔

کراچی میں بھی دھند کا راج

ملک کے دیگر شہروں کی طرح اب شہر قائد میں بھی دھند کا راج ہے، جس کے باعث حد نگاہ 4 کلو میٹر تک محدود ہوگئی ہے۔

محکمہ موسمیات کے مطابق کراچی میں آج کم سے کم درجہ حرارت 18.5 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 26 ڈگری سینٹی گریڈ ریکارڈ ہونے کا امکان ہے۔

شہر قائد میں 10 کلو میٹر فی گھنٹہ کی رفتار سے شمال مشرقی ہوا چل رہی ہے جبکہ آج مطلع جزوی ابر آلود رہے گا۔

کراچی میں تیز بارشوں کا امکان 

موسم کی تازہ ترین اپڈیٹ کے مطابق 25 تا 27 دسمبر کے دوران شہر قائد میں درمیانے درجے کی بارش کا امکان ہے جبکہ چند مقامات پر موسلادھار بارش بھی ہوسکتی ہے۔