وزیر اعلیٰ پنجاب عثمان بزدار نے کہا ہے کہ ہماری حکومت نے ہر ضلع کو علیحدہ ڈویلپمنٹ پیکیج دیا ہے۔

عثمان بزدار سے صوبائی وزیر محنت انصر مجید نیازی اور چیئرمین وزیر اعلیٰ شکایات سیل سرگودھا ڈویژن حسن انعام پراچہ سے ملاقات ہوئی جس میں باہمی دلچسپی کے امور، سیاسی صورتحال اور ترقیاتی منصوبوں پر بات چیت کی گئی۔

ملاقات میں بھلوال کو ضلع بنانے، بھیرہ، ملکوال روڈ اور سالم، بھلوال سرگودھا روڈ کی تعمیر کے حوالے سے بھی تبادلہ خیال کیا گیا۔

عثمان بزدار نے ملاقات میں گفتگو کرتے ہوئے کہا کہ ہم باتیں نہیں بلکہ کام کرتے ہیں، انتظامی بنیادوں پر نئے اضلاع اور تحصیلیں بنانے پر کام جاری ہے۔

انہوں نے کہا کہ بھلوال کو ضلع کا درجہ دینے کا جائزہ لیا جائے گا، ہماری حکومت نے ہر ضلع کو علیحدہ ڈویلپمنٹ پیکیج دیا ہے، 360ارب روپے کے ڈسٹرکٹ ڈویلپمنٹ پیکیج سے ترقی کا نیا دور شروع ہوگا۔

وزیر اعلیٰ پنجاب نے کہا کہ سرگودھا کے عوام کی فلاح و بہبود پر خصوصی توجہ ہے، سرگودھا ڈویژن کی ترقی کے لئے اربوں روپے کے منصوبوں پرکام شروع ہوچکا ہے۔

انکا کہنا ہے کہ ترقی کا سفر ایک علاقے تک محدود نہیں بلکہ پسماندہ علاقوں کو ترقی کے سفر میں برابر کا حصہ دیا ہے۔ پنجاب کے ہر علاقے تک ترقی کے ثمرات پہنچ رہے ہیں، سیاست عوام کی خدمت کا نام ہے۔

انہوں نے کہا کہ اقتدار کو ذاتی تجوریاں بھرنے کیلئے استعمال کرنا ماضی کی حکومتوں کا شیوہ رہا، اب پاکستانی سیاست میں لوٹ مار کے کلچر کی کوئی گنجائش نہیں۔

عثمان بزدار نے مزید کہا کہ ہماری خدمت کی سیاست کے سامنے ان کی افراتفری کی سیاست اپنی موت آپ مر چکی ہے، جلد سرگودھا کا دورہ کروں گا۔