سندھی کلچر ڈے کی تقاریب منانے کا سلسلہ جاری ہے جس کی وجہ سے کراچی کی متعدد سڑکوں پر ٹریفک کی روانی متاثر ہوگئی ہے۔

 تفصیلات کے مطابق یونیورسٹی روڈ، شارع فیصل، صدر، کراچی پریس کلب کی اطراف کی سڑکوں پر سندھی کلچر ڈے کی تقاریب کی وجہ سے ٹریفک کی روانی متاثر ہے جبکہ فوارا چورنگی، میٹرول پول سگنل، آرٹس کونسل چورنگی پر بھی ٹریفک جام ہے۔

 ذرائع کا کہنا ہے کہ سفاری پارک، صفورا چورنگی، سچل گوٹھ، محکمہ موسمیات چورنگی کے اطراف میں ٹریفک کی روانی متاثر ہے جبکہ مختلف سڑکوں پر سندھی کلچر ڈے کی ٹولیوں کی شکل میں نکلنے والی ریلیوں کی وجہ سے ٹریفک کی روانی میں خلل آیا ہے۔

ذرائع کے مطابق ٹریفک پولیس کے اہلکار سڑکوں پر تعینات ہیں، ٹریفک کی روانی بحال کا سلسلہ جاری ہے۔

 واضح رہے کہ وادی سندھ کی صدیوں پرانی تہذیب کو فروغ دینے کے لیے آج سندھ کا ثقافتی دن روایتی جوش و جذبے کے ساتھ منایا جا رہا ہے، اس دن کو منانے کے لیے صوبے بھر میں سرکاری اور غیر سرکاری سطح پر مختلف پروگرام منعقد کیے گئے ہیں۔

عوام کی جانب سے ثقافتی دن پر مختلف مقامات سے ریلیوں کا بھی انعقاد کیا گیا ہے، لوگ سندھ ٹوپی اور اجرک پہن کر سندھ ثقافتی میوزک پر جھوم رہے ہیں اور بچوں کی موج مستیاں بھی جاری ہیں۔

خیال رہے کہ ثقافتی تقریبات میں تقاریر، اسٹیج ڈراماز اور سندھی فنکار اپنے فن کا مظاہرہ کر رہے ہیں۔