ایف آئی اے اینٹی کرپشن سرکل نے کارروائی کے دوران متروکہ املاک ٹرسٹ بورڈ کی ملکیتی 1 ارب روپے سے زائد مالیت کی اراضی پر جعلی دستاویزات کی مدد سے قابض ملزم گرفتار کرلیئے۔

تفصیلات کے مطابق ملزم نے ٹرسٹ کے افسر کی ملی بھگت سے اراضی اپنے اور ساتھی کے نام پر حصول کے بعد لیز کرا لی، ٹرسٹ کی قبضہ کردہ 12 سو اسکوائر گز اراضی راشد منہاس روڈ پر الہ دین پارک سے متصل ہے۔

ذرائع کے مطابق ٹینڈر کے ذریعے سب سے زیادہ بولی کے حامل فرد کی جانب سے رقم جمع نہیں کرائی گئی، اصل بولی دہندہ کی جگہ گرفتار ملزم محمد غوثی اور شریک ملزم قیصر نے اپنے نام سے لیز کی رقم جمع کرا دی۔

 ذرائع کا کہنا ہے کہ ملزمان کے ساتھی ٹرسٹ کے اسسٹنٹ ڈائریکٹر عثمان غورثی نے جعسازی سے ٹرسٹ کے ڈپٹی ڈائریکٹر محمد طفیل کے نام اراضی الاٹ کرا دی، ملزمان نے 2013 میں انقال کر گئے ڈپٹی ڈائریکٹر محمد طفیل کے نام پر 2014 میں جعلسازی سے اراضی کی لیز کرائی۔

سب انسپکٹر محمد شفیع کا کہنا تھا کہ ملزمان کے خلاف ٹرسٹ حکام کی تحریری شکایت پر مقدمہ اندرج کیا گیا ہے۔

ڈپٹی ڈائریکٹر علی مراد نے کہا کہ فراڈ اور جعلسازی میں ملوث ایک ملزم گرفتار، ایک مفرور جبکہ ایک پہلے سے جیل میں ہے۔