امیر جماعت اسلامی سراج الحق نے کہا ہے کہ ملک کی تعمیر میں بلوچوں کا اہم کردار ہے۔

اپنے ایک بیان میں سراج الحق نے کہا کہ چترال سے گوادر تک پی ٹی آئی کی سونامی عوام کے لیے آزمائش بن چکی ہے، گوادر مظاہرین کے مطالبات آئینی اور قانونی ہیں، فی الفور عمل درآمد کیا جائے۔

انہوں نے کہا کہ گوادر کی عوام نے اس لیے احتجاج کا راستہ اپنایا کیوں کہ حکمران گونگے اور بہرے ہیں، جماعت اسلامی ”گوادر کو حق دو تحریک“ کی مکمل تائید کرتی ہے۔

امیر جماعت اسلامی کا کہنا تھا کہ بلوچستان کے نوجوان باصلاحیت اور محب وطن ہیں، بلوچستان معدنیات سے مالا مال، مگر یہاں شرح غربت 71فیصد ہے۔

سراج الحق نے کہا کہ ملک کی تعمیر میں بلوچوں کا اہم کردار ہے، صوبے کی عوام نے ہر مشکل وقت میں پاکستان کا ساتھ دیا۔

ان کا کہنا تھا کہ حکمرانوں کی نااہلی کی وجہ سے صوبے کے نوجوان بے روزگار ہیں ، گزشتہ سوا تین سالوں میں ہر شعبہ میں بیڈگورننس کی تاریخ رقم ہوئی۔

 سراج الحق نے کہا کہ زرعی زمین ہونے کے باوجود بنجر پڑی ہے جبکہ کسان اور مزدور کسمپرسی کی زندگی گزار رہے ہیں۔

امیر جماعت اسلامی سراج الحق کا مزید کہنا تھا کہ جماعت اسلامی کا ایجنڈا ملک میں قرآن وسنت کے نظام کا نفاذ ہے، قوم اس پر یکجا ہے کہ ملک میں اسلامی نظام ہو۔