بلاول بھٹو نے کہا ہے کہ سندھ کی ثقافت انسانی تاریخ کی ایک عظیم تہذیب کا عکس ہے۔

چیئرمین پیپلز پارٹی بلاول بھٹو زرداری نے سندھی کلچر ڈے پر خصوصی پیغام دیتے ہوئے کہا ہے کہ سندھی ثقافت کے دن پر اہلیانِ سندھ سمیت پوری قوم کو مبارکباد دیتا ہوں۔

انہوں نے کہا کہ سندھ کی ثقافت انسانی تاریخ کی ایک عظیم تہذیب کا عکس اور تسلسل ہے ، سندھ کے لوگ تاریخی طور پر بہادر، رواداری پسند ، مہمان نواز اور وسعتِ قلب کے مالک ہوتے ہیں۔

بلاول بھٹو زرداری نے کہا ہے کہ ثقافتی دن منانے سے معاشرے میں بھائی چارے کو فروغ ملتا ہے ، ثقافت کا دن منانے سے رواداری و ہم آہنگی کے رجحانات پروان چڑھتے ہیں۔

  چیئرمین پیپلز پارٹی بلاول بھٹو زرداری نے کہا کہ بلاشبہ پاکستان کے ہر صوبے اور علاقے کی ثقافت ایک منفرد پہچان اور افادیت کی حامل ہے ، اس ثقافتی ورثے کو عالمی سطح پر اجاگر کرنے کے لئے ملک کے تمام  نوجوانوں کو قائدانہ کردار ادا کرنا چاہیے۔