شوکت ترین نے غیر ضروری پرتعیش اشیاء کی درآمدات کوکم کرنے کے لئے متعلقہ حکام کو موثر پالیسی اقدامات اٹھانے کی ہدایت کی ہے ۔

وزیراعظم کے مشیر برائے خزانہ شوکت ترین کی زیر صدارت تجارت کے توازن کا جائزہ اجلاس ہوا جس میں گزشتہ پانچ ماہ جولائی تا نومبر 2021ء کے درآمدی بل کا جائزہ لیا گیا۔

اجلاس کے دوران جاری مالی سال کے پہلے پانچ مہینوں میں درآمدی بل کا تفصیل سے جائزہ لیا گیا ۔

اجلاس  میں مشیر خزانہ  کو بریفنگ دیتے ہوئے کہا گیا کہ  کہ بین الاقوامی منڈی میں توانائی ، سٹیل اور صنعتی خام مال کی قیمتوں میں بلند ترین اضافے کی وجہ سے درآمدی بل کا دبائو بڑھ گیا ہے جبکہ کووڈ 19ویکسین کی درآمدات میں اضافے کی وجہ سے بھی پاکستان کا درآمدی بل بڑھا ہے ۔

بریفنگ دیتے ہوئے مزید کہا گیا کہ  آنے والے مہینوں میں اشیاء خوراک ، فرنس آئل اور ویکسین کی درآمد کی شرح کم رہے گی جس کی وجہ سے مالی سال کے آخری نصف میں درآمدی بل کا دبائو کم ہو گا ۔

مشیر خزانہ شوکت ترین  نے اجلا س کی صدارت کرتے ہوئے متعلقہ حکام کو ہدایت کی کہ غیر ضروری ،پرتعیش اشیاء کی درآمدات کو کم کرنے کے لئے موثر پالیسی اقدامات اٹھائے جائیں ۔

اجلاس میں وفاقی وزیر سید فخر امام ، وفاقی وزیر مخدوم خسرو بختیار ، وزیر توانائی حماد اظہر ، مشیر تجارت عبدالرزاق دائود ، وفاقی سیکرٹریز ، گورنر سٹیٹ بینک ، چیئرمین ایف بی آر اور سینئر سرکاری افسران نے شرکت کی ۔