گورنر خیبرپختونخوا  شاہ فرمان کا کہنا ہے کہ خیبر پختونخوا میں امن و ترقی کیلئے مسیحی برادری کا بہت بڑا حصہ ہے۔

گورنر خیبرپختونخوا شاہ فرمان نے ملک بھر بالخصوص خیبر پختونخوا کی مسیحی برادری کو کرسمس کی مبارکباد دیتے ہوئے کہا کہ مسیحی برادری کی خوشیوں میں برابر کے شریک ہیں۔

 گورنر خیبرپختونخوا شاہ فرمان کا کہنا تھا کہ پاکستان میں تمام اقلیتوں کو مذہبی و شخصی مکمل آزادی و حقوق حاصل ہیں۔

 گورنر شاہ فرمان نے کہا کہ ہم سب کا بحثیت پاکستانی شہری مشترکہ مقصد پاکستان کا  وقار و سلامتی کا تحفظ کرنا ہے۔

انہوں نے مزید کہا کہ مسیحی برادری خوشی کے بڑے موقع پر اپنی عبادات میں پاکستان کی سلامتی و ترقی کیلئے خصوصی دعائیں مانگیں۔

دنیا بھر کی طرح پاکستان میں بھی مسیحی برادری آج 25 دسمبر کو کرسمس کا تہوار انتہائی جوش و خروش، مذہبی تزک و احتشام اور روایتی جذبہ کے ساتھ منا رہی ہے۔

اس دن کی مناسبت سے کرسمس ٹریز کی تیاری کے ساتھ ساتھ تمام چرچز کو انتہائی خوبصورتی سے سجایا گیا ہے۔

سال بھر کا انتظار ختم ہوتے ہی گلی محلوں، گرجا گھروں اور رہائش گاہوں کو برقی قمقموں اور دیدہ زیب سجاوٹی سامان سے سجا دیا گیا جبکہ چرچ اور گرجا گھروں میں عبادات کا سلسلہ بھی جاری ہے۔

واضح رہے کہ مسیحی برادری حضرت عیسٰی علیہ السلام کی ولادت کی خوشی میں ہرسال 25دسمبر کو کرسمس کا تہوار مناتی ہے، جس میں عیسائی برادری کی جانب سے گرجا گھروں اور رہائشی عمارتوں کو برقی قمقموں اور پھولوں کے ساتھ نہایت خوبصورتی سے سجایا جاتا ہے۔